ಮಣ್ಣಿನ ಮಕ್ಕಳು

ಇ-ಪ್ರೀತಿ ಚಿತ್ರದ ನಿರ್ದೇಶಕಿ ಎನ್ಆರ್ಐ ಪ್ರಿಯಾ ಭಾರತಿ

2008-05-06T04:18:00.000-07:00

ಕನ್ನಡ ಚಿತ್ರರಂಗದಲ್ಲಿ ಬೆರಳೆಣಿಕೆಯಷ್ಟು ಮಾತ್ರ ಚಿತ್ರ ನಿರ್ದೇಶಕಿಯರಿದ್ದಾರೆ. ಉದಾಹರಣೆಗೆ ಫಣಿಯಮ್ಮ ಖ್ಯಾತಿಯ ಪ್ರೇಮಾಕಾರಂತ್, ಅರುಣ ರಾಜೆ (ಪತಿತ ಪಾವನಿ), ಜಯಶ್ರೀ ದೇವಿ(ಕೋಣ ಈದೈತೆ, ಭವಾನಿ), ಕವಿತಾ ಲಂಕೇಶ್ (ದೇವೀರಿ, ಬಿಂಬ, ಪ್ರೀತಿ ಪ್ರೇಮ ಪ್ರಣಯ, ತನನಂ ತನನಂ, ಅವ್ವ) ವಿಜಯಲಕ್ಷ್ಮಿ ಸಿಂಗ್(ಈ ಬಂಧನ), ಪೂರ್ಣಿಮಾ ಮೋಹನ್(ಜೂಲಿ), ಪ್ರಿಯಾ ಹಾಸನ್(ಜಂಬದ ಹುಡುಗಿ) ಮತ್ತು ತೀರಾ ಇತ್ತೀಚೆಗಷ್ಟೆ 'ಮುಖಪುಟ' ಎಂಬ ಅಂತಾರಾಷ್ಟ್ರೀಯ ಚಿತ್ರವನ್ನು ರೂಪಾ ಅಯ್ಯರ್ ಕೈಗೆತ್ತಿಕೊಂಡಿದ್ದಾರೆ.

ಈಗ ಇವರ ಸಾಲಿಗೆ ಹೊಸ ತಲೆಮಾರಿನ ಅಮೆರಿಗನ್ನಡತಿ ಪ್ರಿಯಾ ಭಾರತಿ ಸೇರ್ಪಡೆಯಾಗಿದ್ದಾರೆ. ಅವರು ನಿರ್ದೇಶಿಸುತ್ತಿರುವ ಚಿತ್ರ ಇ-ಪ್ರೀತಿ. ಇದು ಆನ್ ಲೈನ್ ಮುಖಾಂತರ ಹುಡುಗ ಹುಡುಗಿ ಪ್ರೇಮಪಾಶಕ್ಕೆ ಬಿದ್ದು, ಜೀವನದ ಪಾಠ ಕಲಿಯುವ ಕಥೆಯನ್ನು ಒಳಗೊಂಡಿದೆ.

ಪ್ರಿಯಾ ಭಾರತಿ ಅವರಿಗೆ ಮುಂಚಿನಿಂದಲೂ ಚಿತ್ರರಂಗದೊಂದಿಗೆ ಒಡನಾಟವಿದೆ. ಅವರು ಈ ಹಿಂದೆ 2001ರಲ್ಲಿ 'ಗುಟ್ಟು' ಎಂಬ ಚಿತ್ರವನ್ನು ಕಿರುತೆರೆಗಾಗಿ ಮಾಡಿದ್ದರು. ವಿಶೇಷವೆಂದರೆ ಈ ಕಿರುಚಿತ್ರದ ಮೂಲಕವೇ ಕಾಮಿಡಿ ಟೈಮ್ ಗಣೇಶ್ ಕನ್ನಡ ಚಿತ್ರರಂಗಕ್ಕೆ ಪರಿಚಯವಾಗಿದ್ದು. ಆಗ ತಾನೇ ಗಣೇಶ್ ಆದರ್ಶ ಫಿಲ್ಮ್ ಸಂಸ್ಥೆಯಿಂದ ನಟನೆಯ ಪಟ್ಟುಗಳನ್ನು ಕಲಿತು ಹೊರಬಂದಿದ್ದರು. ತಮ್ಮ ಕಿರುಚಿತ್ರಕ್ಕಾಗಿ ಪ್ರಿಯಾ ಭಾರತಿ ಪಾತ್ರದ ಅನ್ವೇಷಣೆಯಲ್ಲಿದ್ದರು. ಗಣೇಶ್ ಕಣ್ಣಿಗೆ ಬಿದ್ದಿದ್ದೇ ತಡ ಅವರನ್ನು ಆಯ್ಕೆ ಮಾಡಿಕೊಂಡಿದ್ದರು.

ಪ್ರತಿಭಾ ಪಲಾಯನ ಮಾಡುತ್ತಿರುವ ಯುವಕರ ಕಥೆಯನ್ನು 'ಇ-ಪ್ರೀತಿ' ಹೊಂದಿದೆ. ಅಮೆರಿಕಾದಲ್ಲಿನ ತಮ್ಮ ಗೆಳೆಯರ ನಿಜಜೀವನದಲ್ಲಿ ನಡೆದ ಕಥೆಯನ್ನು ಪ್ರಿಯಾ ಭಾರತಿ ಬೆಳ್ಳಿತೆರೆಗೆ ತರುತ್ತಿದ್ದಾರೆ. ಕಥೆಯಲ್ಲಿ ಹಾಸ್ಯ, ಪ್ರೀತಿ, ಪ್ರೇಮ, ತಂತ್ರಜ್ಞಾನ ಎಲ್ಲವೂ ಹದವಾಗಿ ಮಿಳಿತವಾಗಿವೆಯಂತೆ. ನಾಯಕ ಇಂಜಿನಿಯರಿಂಗ್ ಮುಗಿಸಿ ವಿದೇಶಕ್ಕೆ ಹೋಗಿರುತ್ತಾನೆ. ಅಲ್ಲೊಬ್ಬ ಬೆಡಗಿ ಅವನ ಹೃದಯವನ್ನು ಕದಿಯುತ್ತಾಳೆ. ಅವಳೊಂದಿಗೆ ಬೆರೆತು, ನಲಿಯುತ್ತಾನೆ. ಕೊನೆಗೆ ಅವನಿಗೆ ಜ್ಞಾನೋದಯವಾಗಿ ನಮಗೆ ನಮ್ಮ ದೇಶವೇ ಚಂದ ಎಂದುಕೊಳ್ಳುತ್ತಾನೆ.

ಗಾಳಿಪಟ ಚಿತ್ರದಲ್ಲಿ ನಟಿಸಿದ್ದ ದಿಗಂತ್ 'ಇ-ಪ್ರೀತಿ' ಚಿತ್ರಕ್ಕೆ ನಾಯಕ ನಟನಾಗಿ ಆಯ್ಕೆಯಾಗಿದ್ದಾರೆ. ಯುಎಸ್‍ಎ ಮೂಲದ ನೀನಾ ಮಹೇಶ್ ಮತ್ತು ತೇಜಸ್ವಿನಿ ನಾಯಕಿಯರು

ರಕ್ಷಣಾ ವೇದಿಕೆ ಬೆನ್ನು ಹತ್ತಿದ ರಾಜಕೀಯ ಪಕ್ಷಗಳು

2008-05-06T04:14:00.000-07:00

ಕರ್ನಾಟಕದಲ್ಲಿ ಪ್ರಾಬಲ್ಯ ಇರುವ ಕನ್ನಡಪರ ಸಂಘಟನೆಗಳ ಬೆಂಬಲ ಪಡೆದು ಅಧಿಕಾರದ ಗದ್ದುಗೆ ಏರಲು ವಿವಿಧ ರಾಜಕೀಯ ಪಕ್ಷಗಳು ಕಸರತ್ತು ನಡೆಸುತ್ತಿವೆ. ಅದರಲ್ಲೂ ಕರ್ನಾಟಕ ರಕ್ಷಣಾ ವೇದಿಕೆ ರಾಜ್ಯಾಧ್ಯಕ್ಷ ಟಿ.ಎ.ನಾರಾಯಣಗೌಡ ಅವರನ್ನು ಬುಟ್ಟಿಗೆ ಹಾಕಿಕೊಳ್ಳುವ ಹಣಣಿಕೆಯಲ್ಲಿ ಹಲವಾರು ರಾಜಕೀಯ ಪಕ್ಷಗಳು ನಿರತವಾಗಿವೆ.

ಕಾಂಗ್ರೆಸ್ ಮತ್ತು ಬಿಜೆಪಿ ಸೇರಿದಂತೆ ವಿವಿಧ ರಾಜಕೀಯ ಪಕ್ಷಗಳು ಕರ್ನಾಟಕ ರಕ್ಷಣಾ ವೇದಿಕೆಯ ಬೆನ್ನು ಹತ್ತಿವೆ. ರಾಜ್ಯವ್ಯಾಪಿ ಅನೇಕ ಕಾರ್ಯಕರ್ತರು ಹಾಗೂ ಸದಸ್ಯರನ್ನು ಹೊಂದಿರುವ ಕರವೇ ಅಧ್ಯಕ್ಷ ಟಿ.ಎ.ನಾರಾಯಣಗೌಡ ಅವರನ್ನು ರಾಜಕೀಯ ಆಖಾಡಕ್ಕೆ ಕರೆತರಲು ಅವರನ್ನು ಓಲೈಸುತ್ತಿವೆ. ಒಂದು ವೇಳೆ ಕರವೇ ಯಾವುದಾದರೂ ಪಕ್ಷಕ್ಕೆ ಒಲಿದರೆ ಆ ಪಕ್ಷ ಗೆಲ್ಲುವುದು ಖಾಯಂ ಎಂದು ಭಾವಿಸಲಾಗಿದೆ. ಆದರೆ ಕರವೇ ಮಾತ್ರ ಯಾವ ಪಕ್ಷಕ್ಕೂ ಒಲಿದಿಲ್ಲ. ಇದುವರೆಗೆ ನಾರಯಣಗೌಡರು ಈ ವಿಷಯವಾಗಿ ಯಾವುದೇ ನಿರ್ಣಯ ಕೈಗೊಂಡಿಲ್ಲ.

ಚುನಾವಣೆ ದಿನಾಂಕ ಪ್ರಕಟನೆಯಾದಾಗಿನಿಂದ ತಮಗೆ ಇಂತಹ ಒತ್ತಡಗಳು ಬರುತ್ತಿವೆ. ಆದರೂ ತಾವು ಯಾವುದೇ ನಿರ್ಧಾರ ಕೈಗೊಂಡಿಲ್ಲ ಎಂದು ನಾರಾಯಣಗೌಡರು ಸ್ಪಷ್ಟಪಡಿಸಿದ್ದಾರೆ. ರಾಜ್ಯಮಟ್ಟದ ಪದಾಧಿಕಾರಿಗಳ ಸಭೆ ಕರೆದು ಚರ್ಚಿಸಿ ಮುಂದಿನ ಹೆಜ್ಜೆ ಇಡುವುದಾಗಿ ಅವರು ತಿಳಿಸಿದ್ದಾರೆ. ಈಗಾಗಲೇ ಒಂದು ಹಂತದ ಮಾತುಕತೆ ನಡೆಸಿರುವ ಅವರು ಮತ್ತೊಮ್ಮೆ ಸಭೆ ಕರೆದು ಅಂತಿಮ ನಿರ್ಧಾರ ಕೈಗೊಳ್ಳುವುದಾಗಿ ತಿ ಹೇಳಿದ್ದಾರೆ. ಕರವೇ ರಾಜಕೀಯ ಪ್ರವೇಶ ಮಾಡುತ್ತದೋ ಇಲ್ಲವೊ ಎನ್ನುವುದನ್ನು ಕಾದು ನೋಡಬೇಕಾಗಿದೆ.

ಬನ್ನಿ ಕನ್ನಡಿಗರೇ ಒಂದೆಡೆ ಸೇರೋಣ: ಬನವಾಸಿಗರ ಕರೆ

2008-04-10T06:40:00.001-07:00

ಕನ್ನಡ ಮತ್ತು ಕನ್ನಡಿಗರನ್ನು ಒಗ್ಗೂಡಿಸುವ ಸಲುವಾಗಿ ಏ.13 ರಂದು ನಗರದ ನೃಪತುಂಗ ರಸ್ತೆಯಲ್ಲಿರುವ ಮಿಥಿಕ್ ಸೊಸೈಟಿಯಲ್ಲಿ ಬನವಾಸಿ ಬಳಗ ಕನ್ನಡ ಕೂಟ ಕಾರ್ಯಕ್ರಮವನ್ನು ಏರ್ಪಡಿಸಿದೆ.

ಕರ್ನಾಟಕದ ಮೂಲೆ ಮೂಲೆಯಿಂದ ಹಾಗೂ ವಿಶ್ವದ ಎಲ್ಲಡೆ ನೆಲೆಸಿರುವ ಕನ್ನಡಿಗರನ್ನು ಕಾರ್ಯಕ್ರಮಕ್ಕೆ ಆಹ್ವಾನಿಸಲಾಗಿದೆ. ಕನ್ನಡದ ನೆಲ, ಜಲ ಕುರಿತು ಚರ್ಚೆ ನಡೆಸಲಾಗುವುದು. 'ನಮಗಾಗಿ ಕನ್ನಡ ನೆಲ ಏನೆಲ್ಲ ನೀಡಿದೆ. ನಾಡಿಗಾಗಿ ನಮ್ಮ ಕೊಡುಗೆ ಏನು, ಕನ್ನಡ, ಕನ್ನಡಕ್ಕಾಗಿ ನಾವೇನು ಮಾಡಿದ್ದೇವೆ.' ಈ ಘೋಷ ವಾಕ್ಯದೊಂದಿಗೆ ಕಾಯಕ್ರಮವನ್ನು ಏರ್ಪಡಿಸಲಾಗಿದೆ. ನಾಡು, ನುಡಿಗೆ ಸೇವೆ ಮಾಡಲು ಉತ್ಸುಕರಾದವರು ಬನವಾಸಿ ಬಳಗ ಏರ್ಪಡಿಸಿರುವ ಕನ್ನಡಿಗರ ಕೂಟದಲ್ಲಿ ಭಾಗವಹಿಸಬಹುದು.

ಸಮಯ: 11 ರಿಂದ 1 ಗಂಟೆ
ಸ್ಥಳ: ಮಿಥಿಕ್ ಸೊಸೈಟಿ, ಯವನಿಕಾ ಮುಂಭಾಗ, ನೃಪತುಂಗ ರಸ್ತೆ, ಬೆಂಗಳೂರು
ಹೆಚ್ಚಿನ ವಿವರಗಳಿಗಾಗಿ : banavasibalaga@gmail.com ಗೆ ಪತ್ರ ಬರೆಯಬಹುದು.

ರಜನಿಯಿಂದ ಕ್ಷಮೆ : ಕನ್ನಡಪರ ಸಂಘಟನೆಗಳ ಬಿಗಿಪಟ್ಟು

2008-04-10T06:37:00.000-07:00

ಹೊಗೇನಕಲ್ ವಿವಾದಕ್ಕೆ ಸಂಬಂಧಿಸಿದಂತೆ ಕನ್ನಡಿಗರನ್ನು ಅವಮಾನಿಸಿಲ್ಲ ಎಂದು ತಮಿಳು ನಟ ರಜನಿಕಾಂತ್ ನೀಡಿರುವ ಸಮಜಾಯಿಷಿಯನ್ನು ಕನ್ನಡಪರ ಸಂಘಟನೆಗಳು ಸಾರಾಸಗಟಾಗಿ ತಿರಸ್ಕರಿಸಿದ್ದು ರಜನಿ ಕನ್ನಡಿಗರನ್ನು ಬೇಷರತ್ತಾಗಿ ಕ್ಷಮೆ ಕೇಳಬೇಕೆಂದು ಪಟ್ಟುಹಿಡಿದಿವೆ.

ಈ ಕುರಿತಂತೆ ಕನ್ನಡ ರಕ್ಷಣಾ ವೇದಿಕೆ ರಾಜ್ಯಾಧ್ಯಕ್ಷ ನಾರಾಯಣ ಗೌಡ, ರಾಜಕುಮಾರ್ ಅಭಿಮಾನಿಗಳ ಸಂಘದ ಅಧ್ಯಕ್ಷ ಸಾ.ರಾ.ಗೋವಿಂದು, ವಾಟಾಳ್ ಪಕ್ಷದ ನಾಯಕ ವಾಟಾಳ ನಾಗರಾಜ್, ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷ ಚಂದ್ರಶೇಖರ್ ಪಾಟೀಲ್, ಬಿಜೆಪಿ ನಾಯಕ ಮುಖ್ಯಮಂತ್ರಿ ಚಂದ್ರು ಅವರು ಮಂಗಳವಾರ ನೀಡಿರುವ ಹೇಳಿಕೆಯಲ್ಲಿ ತಮ್ಮ ನಿಲುವನ್ನು ಮತ್ತೆ ಸ್ಪಷ್ಟಪಡಿಸಿದ್ದಾರೆ. ವಿಷ್ಣು, ಅಂಬಿ, ಕಾರ್ನಾಡ್ ಅಂಥವರು ಮಾತ್ರ ಕೇಳಿಕೊಂಡರೆ ಕ್ಷಮೆ ಕೇಳುವುದಾಗಿ ರಜನಿ ಹೇಳಿರುವ ಹೇಳಿಕೆಯಿಂದ ಸಂಘಟನೆಗಳು ಮತ್ತಷ್ಟು ಕೆರಳಿವೆ.

ರಜನಿಕಾಂತ್ ಅವರೊಡನೆ ಎರಡು ತಮಿಳು ಮತ್ತು ಒಂದು ಹಿಂದಿ ಚಿತ್ರ ಮಾಡಿರುವ ಅವರ ಆತ್ಮೀಯ ಸ್ನೇಹಿತರಾದ ನಟ, ನಿರ್ದೇಶಕ ದ್ವಾರಕೀಶ್ ಕೂಡ ರಜನಿಕಾಂತ್ ಅವರು ಕ್ಷಮೆ ಕೇಳಿದರೆ ಅವರ ಘನತೆ ಹೆಚ್ಚುತ್ತದೆ ಎಂದು ಹೇಳಿದ್ದಾರೆ.

ಕನ್ನಡಪರ ಸಂಘಟನೆಗಳ ನೇತೃತ್ವವಹಿಸಿರುವ ಕರ್ನಾಟಕ ರಕ್ಷಣಾ ವೇದಿಕೆಯ ರಾಜ್ಯಾಧ್ಯಕ್ಷ ಟಿ.ಎ.ನಾರಾಯಣ ಗೌಡ ಅವರು, ರಜನಿಕಾಂತ್ ಆಡಿರುವ ಮಾತುಗಳು ಹೊಗೇನಕಲ್‌ಗಾಗಿ ಹೋರಾಡುತ್ತಿರುವ ಸಂಘಟನೆಗಳನ್ನು ಮಾತ್ರವಲ್ಲ ಇಡೀ ರಾಜ್ಯದ ಕನ್ನಡಿಗರನ್ನು ಅವಮಾನಿಸಿವೆ. ಅವರು ಕ್ಷಮೆ ಕೇಳಲೇಬೇಕು. ನಂತರವಷ್ಟೇ ಅವರ ಚಿತ್ರಗಳನ್ನು ಕರ್ನಾಟಕದಲ್ಲಿ ಪ್ರದರ್ಶಿಸಲು ಮತ್ತು ಅವರಿಗೆ ಚಿತ್ರೀಕರಣವನ್ನು ನಡೆಸಲು ಅವಕಾಶ ನೀಡುತ್ತೇವೆ. ಕ್ಷಮೆ ಕೇಳಿದ ನಂತರವಷ್ಟೇ ಅವರು ರಾಜ್ಯದಲ್ಲಿ ಕಾಲಿಡಬೇಕು ಎಂದು ಆರ್ಭಟಿಸಿದ್ದಾರೆ. ಇದೇ ಅಭಿಪ್ರಾಯವನ್ನು ವಾಟಾಳ್ ನಾಗರಾಜ್ ಪ್ರತಿಧ್ವನಿಸಿದ್ದಾರೆ.

ರಜನಿಯನ್ನು ತರಾಟೆಗೆ ತೆಗೆದುಕೊಂಡಿರುವ ಚಂಪಾ, ತಮಿಳುನಾಡಿನಲ್ಲಿ ಪ್ರತಿಭಟನೆಯಲ್ಲಿ ಅನೇಕ ನಟರು ಮಾತನಾಡಿದರು. ಆದರೆ, ರಜನಿಯ ಮಾತುಗಳು ಮಾತ್ರ ಉದ್ರೇಕಿಸುವಂತಿದ್ದವು. ಅವರು ಕರ್ನಾಟಕದ ಕನ್ನಡಿಗರ ಭಾವನೆಗಳಿಗೆ ಘಾಸಿಯುಂಟು ಮಾಡಿದ್ದಾರೆ. ಅವರೇ ಮಾಡಿದ ತಪ್ಪಿಗಾಗಿ ಅವರು ಕ್ಷಮೆ ಕೇಳಲೇಬೇಕು ಎಂದು ಪಟ್ಟುಹಿಡಿದಿದ್ದಾರೆ.

ಕನ್ನಡ ಚಿತ್ರರಂಗ ನಡೆಸಿದ ಧರಣಿ ಸತ್ಯಾಗ್ರಹದ ನೇತೃತ್ವ ವಹಿಸಿದ್ದ ಸಾರಾ ಗೋವಿಂದು ಅವರು, ಕರ್ನಾಟಕಕ್ಕಿಂತ ತಮಿಳುನಾಡಿನಲ್ಲೇ ಹೆಚ್ಚಿನ ಹಿಂಸಾಚಾರ ನಡೆದಿದೆ. ಕನ್ನಡದವರ ಹೊಟೇಲುಗಳ ಮೇಲೆ ದಾಳಿ ನಡೆದಿದೆ, ಇಲ್ಲಿಗಿಂತ ಹೆಚ್ಚಿನ ವಾಹನಗಳನ್ನು ಸುಟ್ಟುಹಾಕಲಾಗಿದೆ. ಸ್ಪಷ್ಟೀಕರಣ ಕೊಟ್ಟರೆ ಯಾವುದೇ ಪ್ರಯೋಜನವಿಲ್ಲ. ಅವರು ಕನ್ನಡಿಗರ ಕ್ಷಮೆ ಕೇಳಲೇಬೇಕು ಎಂದು ಆಗ್ರಹಿಸಿದ್ದಾರೆ.

ತಾಜ್‌ವೆಸ್ಟೆಂಡ್‌ನಲ್ಲಿ ಕರವೇ ಕಾರ್ಯಕರ್ತರ ದಾಂಧಲೆ

2008-04-10T06:36:00.001-07:00

ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಪ್ರಾಧಿಕಾರಕ್ಕೆ ಸೇವೆ ಒದಗಿಸಲಿರುವ ವಿ-ಲಿಂಕ್ ಟ್ಯಾಕ್ಸಿ ಸೇವೆಯನ್ನು ಹೊರ ರಾಜ್ಯದವರಿಗೆ ಗುತ್ತಿಗೆ ನೀಡಿದೆ ಎಂದು ಆರೋಪಿಸಿ ಕರ್ನಾಟಕ ರಕ್ಷಣಾ ವೇದಿಕೆ ಕಾರ್ಯಕರ್ತರು ತಾಜ್‌ವೆಸ್ಟೆಂಡ್ ಹೋಟೆಲ್‌ಗೆ ನುಗ್ಗಿ ಮಂಗಳವಾರ ದಾಂಧಲೆ ನಡೆಸಿದ್ದಾರೆ.

ಮಂಗಳವಾರ ರಾತ್ರಿ ತಾಜ್ ವೆಸ್ಟೆಂಡ್ ಹೋಟೆಲ್‌ನಲ್ಲಿ ಆಯೋಜಿಸಿದ್ದ ಟ್ಯಾಕ್ಸಿ ಸೇವೆ ಉದ್ಟಾಟನಾ ಸಮಾರಂಭಕ್ಕೆ ಸುಮಾರು 40 ಮಂದಿ ಕರವೇ ಕಾರ್ಯಕರ್ತರು ಘೋಷಣೆಗಳನ್ನು ಕೂಗುತ್ತಾ ನುಗ್ಗಿ ಅಲ್ಲಿನ ಪೀಠೋಪಕರಣಗಳು ಹಾಗೂ ಇಂಗ್ಲಿಷ್ ನಾಮಫಲಕಗಳನ್ನು ಧ್ವಂಸಗೊಳಿಸಿದರು. ಇದರಿಂದ ಕೆಲಕಾಲ ಆತಂಕದ ಪರಿಸ್ಥಿತಿ ನಿರ್ಮಾಣವಾಯಿತು.

ಟ್ಯಾಕ್ಸಿ ಸೇವೆಯನ್ನು ಮುಂಬೈ ಮೂಲದ ವಿ-ಲಿಂಕ್ ಸಂಸ್ಥೆಗೆ ನೀಡಿರುವ ಕಾರಣ ಕರ್ನಾಟಕ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮದಡಿ (ಕೆ‌ಎಸ್‌ಟಿಡಿಸಿ) ಕಾರ್ಯನಿರ್ವಹಿಸುತ್ತಿರುವ ಕನ್ನಡಿಗರಿಗೆ ಅನ್ಯಾಯವಾಗುತ್ತದೆ. ಸಾವಿರಾರು ಚಾಲಕರು ಬೀದಿಗೆ ಬೀಳುತ್ತಾರೆ ಎಂದು ಆರೋಪಿಸಿ ದಾಂಧಲೆ ನಡೆಸಿದರು.

ಕರ್ನಾಟಕದ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮದಡಿ 700ಕ್ಕೂ ಹೆಚ್ಚು ಕನ್ನಡಿಗರು ಟ್ಯಾಕ್ಸಿ ಚಾಲಕರಾಗಿ ದುಡಿಯುತ್ತಿದ್ದಾರೆ. ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸೇವೆ ಒದಗಿಸುವ ಟ್ಯಾಕ್ಸಿ ಸೇವೆಯನ್ನು ಮುಂಬೈ ಮೂಲದ ಸಂಸ್ಥೆಗೆ ನೀಡುವುದರಿಂದ ಉತ್ತರ ಭಾರತೀಯರಿಗೆ ಉದ್ಯೋಗ ದೊರೆಯುತ್ತದೆ ಹೊರತು ಕನ್ನಡಿಗರಿಗಲ್ಲ. ವಿ-ಲಿಂಕ್ ಅಧಿಕಾರಿಗಳು ಕನ್ನಡಿಗರಿಗೆ ಉದ್ಯೋಗ ನೀಡುವುದಾಗಿ ಹೇಳಿದ್ದರು. ಆದರೆ ಈಗ ಉತ್ತರ ಭಾರತದ ಚಾಲಕರನ್ನು ನೇಮಕ ಮಾಡಿಕೊಂಡಿದ್ದಾರೆ ಎಂದು ಕರವೇ ಆರೋಪಿಸಿದೆ.

ಈ ವಿಚಾರದಲ್ಲಿ ಕನ್ನಡಿಗರಿಗೆ ಆಗುತ್ತಿರುವ ಅನ್ಯಾಯವನ್ನು ತಪ್ಪಿಸಬೇಕು. ಖಾಸಗಿ ಸಂಸ್ಥೆಗೆ ನೀಡಿರುವ ಗುತ್ತಿಗೆಯನ್ನು ಹಿಂದಕ್ಕೆ ಪಡೆಯಬೇಕು. ತಪ್ಪಿ ನಡೆದರೆ ಉಗ್ರ ಪ್ರತಿಭಟನೆ ನಡೆಸುವುದಾಗಿ ಕರವೇ ಕಾರ್ಯಕರ್ತರು ಎಚ್ಚರಿಸಿದ್ದಾರೆ. ಪ್ರತಿಭಟನೆಯಲ್ಲಿ ಕರವೇ ಬೆಂಗಳೂರು ಜಿಲ್ಲಾ ಘಟಕದ ಅಧ್ಯಕ್ಷ ಆಂಜನಪ್ಪ, ನಗರ ಘಟಕದ ಅಧ್ಯಕ್ಷ ಕೆ.ಎಂ.ನಾಗೇಂದ್ರ ಬಾಬು ಮತ್ತಿತರರು ಭಾಗವಹಿಸಿದ್ದರು.

ಕನ್ನಡಚಿತ್ರಗಳಿಗೆ ಇಂಗ್ಲಿಷ್ ಹೆಸರು ಬೇಡ: ಸಿದ್ಧಲಿಂಗಯ್ಯ

2008-04-10T06:32:00.000-07:00

ಆಂಗ್ಲ ಪದ ಬಳಸಿ ಹೆಸರಿಡುವ ಕನ್ನಡ ಚಿತ್ರಗಳಿಗೆ ಸರಕಾರ ಅನುದಾನವನ್ನು ನೀಡಬಾರದು ಎಂದು ಕನ್ನಡ ಅಭಿವೃದ್ಧಿ ಪ್ರಾಧಿಕಾರ ಅಧ್ಯಕ್ಷ ಸಿದ್ಧಲಿಂಗಯ್ಯ ಸರಕಾರವನ್ನು ಒತ್ತಾಯಿಸಿದ್ದಾರೆ.

ಕನ್ನಡ ಚಲನಚಿತ್ರಗಳ ಮೇಲೆ ಸವಾರಿ ಮಾಡುತ್ತಿರುವ ಅನ್ಯ ಭಾಷೆಗಳ ಪ್ರಭಾವ ಮತ್ತು ಇಂಗ್ಲಿಷ್ ವ್ಯಾಮೋಹವನ್ನು ಕಡಿಮೆ ಮಾಡಲು ಕನ್ನಡ ಅಭಿವೃದ್ಧಿ ಪ್ರಾಧಿಕಾರ ಚಿಂತನೆ ನಡೆಸಿದ್ದು, ಆಂಗ್ಲ ಶೀರ್ಷಿಕೆ ಹೊಂದಿರುವ ಕನ್ನಡದ ಯಾವ ಚಿತ್ರಗಳಿಗೂ ಅನುದಾನವನ್ನು ನೀಡಬಾರದು ಎಂದು ಸಿದ್ಧಲಿಂಗಯ್ಯ ಹೇಳಿದರು.

ಇತ್ತೀಚಿನ ದಿನಗಳಲ್ಲಿ ಕನ್ನಡ ಚಿತ್ರಗಳ ಮೇಲೆ ಇಂಗ್ಲಿಷ್ ಪ್ರಭಾವ ಹೆಚ್ಚಾಗತೊಡಗಿದ್ದು, ಅದನ್ನು ತಡೆಯಲು ಅನಿವಾರ್ಯವಾಗಿ ಕ್ರಮ ಕೈಗೊಳ್ಳಬೇಕಾಗಿದೆ ಎಂದರು. ಈಚೆಗೆ ಬಂದಿರುವ ಅನೇಕ ಚಿತ್ರಗಳ ಹೆಸರುಗಳು ಆಂಗ್ಲಪದಗಳಲ್ಲಿ ಇವೆ ಎಂದು ವಿಷಾದ ವ್ಯಕ್ತಪಡಿಸಿದರು. ಕನ್ನಡಚಿತ್ರಗಳಿಗೆ ಹೆಸರನ್ನು ಕನ್ನಡಲ್ಲೇ ಇಡಬೇಕು ಎಂಬ ಕಾನೂನನ್ನು ಶೀಘ್ರದಲ್ಲೇ ರೂಪಿಸಲಾಗುವುದು. ತಮಿಳು ಚಿತ್ರರಂಗದಲ್ಲಿ ಈಗಾಗಲೇ ಈ ಕಾನೂನು ಜಾರಿಯಾಗಿದ್ದು, ಕನ್ನಡದಲ್ಲಿಯೂ ಈ ಕಾನೂನು ಜಾರಿಗೊಳಿಸಲು ಪ್ರಯತ್ನ ನಡೆದಿದೆ ಎಂದು ಸಿದ್ಧಲಿಂಗಯ್ಯ ತಿಳಿಸಿದರು.

ಸಿಹಿ ಸುದ್ದಿ: ನಿಮ್ಮ ಕಾರು ಓಡಿಸಲು ಸಕ್ಕರೆ!

2008-04-10T06:29:00.000-07:00

ಇದೋ ಬಂದಿದೆ ಮತ್ತೊಂದು ಆವಿಷ್ಕಾರ. ಸಸ್ಯಜನ್ಯ ಶರ್ಕರವೇ ಇನ್ನು ಮುಂದೆ ಕಾರುಗಳ ಇಂಧನವಾಗಲಿದೆ.

ಸಸ್ಯಗಳಲ್ಲಿ ದೊರೆಯುವ ಸಕ್ಕರೆಯನ್ನು ಹೈಡ್ರೋಜನ್ (ಜಲಜನಕ) ಆಗಿ ಪರಿವರ್ತಿಸುವ 'ಕ್ರಾಂತಿಕಾರಿ' ಪ್ರಕ್ರಿಯೆಯೊಂದನ್ನು ಅಭಿವೃದ್ಧಿಪಡಿಸಿರುವುದಾಗಿ ಸಂಶೋಧಕರು ಹೇಳಿದ್ದು, ಅದನ್ನು ಅತ್ಯಂತ ಮಿತವ್ಯಯದಲ್ಲಿ ಮತ್ತು ಪರಿಣಾಮಕಾರಿಯಾಗಿ ವಾಹನಗಳನ್ನೋಡಿಸಲು ಬಳಸಬಹುದಾಗಿದೆ ಎಂದು ಹೇಳಿಕೊಂಡಿದ್ದಾರೆ.

ಸಂಶೋಧಕರ ಪ್ರಕಾರ, ಗಿಡಗಳಲ್ಲಿ ದೊರೆಯುವ ಸಕ್ಕರೆಯ ಅಂಶ, ನೀರು ಮತ್ತು ಶಕ್ತಿಶಾಲಿ ಕಿಣ್ವಗಳ ಸಮ್ಮಿಶ್ರಣದೊಂದಿಗಿರುವ ಪರಿವರ್ತನಾ ಕ್ರಿಯೆಯು ಲಘು ಕ್ರಿಯಾ ಪರಿಸ್ಥಿತಿಗಳಲ್ಲಿ ಹೈಡ್ರೋಜನ್ ಮತ್ತು ಕಾರ್ಬನ್ ಡೈಆಕ್ಸೈಡ್ ಉತ್ಪಾದಿಸುತ್ತದೆ. ಇದು ಯಾವುದೇ ವಾಸನೆ ಉತ್ಪಾದಿಸುವುದಿಲ್ಲ. ಅನರೋಬಿಕ್ ಫರ್ಮೆಂಟೇಶನ್ ವಿಧಾನಗಳಿಗಿಂತ ಮೂರು ಪಟ್ಟು ಹೈಡ್ರೋಜನ್ ಉತ್ಪಾದಿಸಬಹುದಾಗಿದ್ದು, ಈ ವಿಧಾನವನ್ನು "ಇನ್ ವಿಟ್ರೋ ಸಿಂಥೆಟಿಕ್ ಬಯಾಲಜಿ" ಎಂದು ಕರೆಯಲಾಗುತ್ತದೆ.

ಈ ಪ್ರಕ್ರಿಯೆಯು, ಜಲಜನಕದ ಬಳಕೆಗೆ ಸಂಬಂಧಿಸಿ ಅತ್ಯಂತ ದೊಡ್ಡ ತಡೆ ಎಂದು ಅಂದುಕೊಂಡಿದ್ದ, ಕಡಿಮೆ ವೆಚ್ಚದ ಹೈಡ್ರೋಜನ್ ಉತ್ಪಾದನೆ, ಹೈಡ್ರೋಜನನ್ನು ಹೇಗೆ ಸಂಗ್ರಹಿಸುವುದು ಮತ್ತು ಅದನ್ನು ಪರಿಣಾಮಕಾರಿಯಾಗಿ ಹೇಗೆ ವಿತರಿಸುವುದು ಎಂಬ ಮೂರು ತಾಂತ್ರಿಕ ಅಡಚಣೆಯ ಅಂಶಗಳನ್ನು ಸಮರ್ಥವಾಗಿ ಎದುರಿಸುತ್ತದೆ ಎಂದಿದ್ದಾರೆ ಸಂಶೋಧಕರು.

ಇದೊಂದು ಕ್ರಾಂತಿಕಾರಿ ಕೆಲಸ. ಹೈಡ್ರೋಜನ್ ಸಂಶೋಧನೆಯಲ್ಲಿ ಇದೊಂದು ಹೊಚ್ಚ ಹೊಸ ಆಶಾದಾಯಕ ಬೆಳವಣಿಗೆ. ತಂತ್ರಜ್ಞಾನವನ್ನು ಮತ್ತಷ್ಟು ಸುಧಾರಿಸಿದಲ್ಲಿ, ಸಕ್ಕರೆ ಆಧಾರಿತ ವಾಹನಗಳು ಬೀದಿಗಿಳಿಯುವುದರಲ್ಲಿ ಸಂದೇಹವಿಲ್ಲ ಎಂದು ವರ್ಜೀನಿಯಾ ಟೆಕ್ ಯುನಿವರ್ಸಿಟಿಯ ಪ್ರಧಾನ ಸಂಶೋಧಕ ಪರ್ಸಿವಲ್ ಜಾಂಗ್ ಹೇಳಿದ್ದಾರೆ.

ಸಸ್ಯ ಸಂಪತ್ತಿನಿಂದ ಹೈಡ್ರೋಜನ್ ಬೇರ್ಪಡಿಸುವ ಅತ್ಯಂತ ಭರವಸೆಯ ವಿಧಾನವೊಂದನ್ನು ಪತ್ತೆ ಹಚ್ಚಿರುವುದಾಗಿ ಈ ಸಂಶೋಧಕರು ಹೇಳಿದ್ದಾರೆ. ಇದುವರೆಗೆ ಹೈಡ್ರೋಜನ್ ಬೇರ್ಪಡಿಸುವುದೇ ಅತ್ಯಂತ ದುಬಾರಿ ಪ್ರಕ್ರಿಯೆಯಾಗಿತ್ತು. ಇದೀಗ ಹೈಡ್ರೋಜನ್ ಈಗಿರುವ ಪೆಟ್ರೋಲಿಯಂ ಇಂಧನಕ್ಕಿಂತ ಹೆಚ್ಚು ಪರಿಶುದ್ಧವಾಗಿ, ಅಗ್ಗವೂ, ಪರಿಸರಕ್ಕೆ ಪೂರಕವೂ ಆಗಿರುವುದರಿಂದ ಜಲಜನಕದಿಂದ ಇಂಧನ ತಯಾರಿಸುವುದು ಹೇಗೆಂಬ ಬಗ್ಗೆ ತಲೆ ಕೆಡಿಸಿಕೊಂಡ ದೇಶ-ವಿದೇಶಗಳ ಸಂಶೋಧಕರು ನಿರಾಳತೆ ಅನುಭವಿಸಿದ್ದಾರೆ.

ಹೊಗೆ: ಕರುಣಾ ರಾಜೀನಾಮೆಗೆ ಜಯಾ ಆಗ್ರಹ

2008-04-09T06:01:00.000-07:00

ಹೊಗೇನಕಲ್‌ನ ಹೊಗೆ ಸದ್ಯಕ್ಕೆ ಶಮನವಾಗಿರಬಹುದು, ಆದರೆ ಕರ್ನಾಟಕ ಚುನಾವಣೆಗಳು ಪೂರ್ಣಗೊಳ್ಳುವವರೆಗೂ ಯೋಜನೆಯನ್ನು ತಡೆಹಿಡಿಯುವುದಾಗಿ ಘೋಷಿಸಿರುವ ತಮಿಳುನಾಡು ಮುಖ್ಯಮಂತ್ರಿ ಎಂ.ಕರುಣಾನಿಧಿ ಅವರು ತಮ್ಮ ಹೇಳಿಕೆಯ ಬಿಸಿ ಎದುರಿಸುತ್ತಿದ್ದಾರೆ.

ಕುಡಿಯುವ ನೀರಿನ ಯೋಜನೆಗೆ ಸಂಬಂಧಿಸಿ ಜನರಿಗೆ ದ್ರೋಹ ಮಾಡಿದ ಮುಖ್ಯಮಂತ್ರಿ ರಾಜೀನಾಮೆ ನೀಡುವಂತೆ ಮಾಜಿ ಮುಖ್ಯಮಂತ್ರಿ, ಪ್ರಧಾನ ಪ್ರತಿಪಕ್ಷ ನಾಯಕಿ ಜೆ.ಜಯಲಲಿತಾ ಅವರು ಒತ್ತಾಯಿಸಿದ್ದಾರೆ.

ತಮ್ಮ ಪುತ್ರಿ ಕಾನಿಮೋಳಿಗೆ ಕೇಂದ್ರ ಸಚಿವ ಸಂಪುಟದಲ್ಲಿ ಸ್ಥಾನ ದೊರಕಿಸುವುದಕ್ಕೆ ಪ್ರತಿಯಾಗಿ ಚೌಕಾಶಿಯಲ್ಲಿ ತೊಡಗಿದ ಕರುಣಾನಿಧಿ ಅವರು, ಯೋಜನೆ ಸ್ಥಗಿತಗೊಳಿಸುವ ನಿಟ್ಟಿನಲ್ಲಿ ಕೇಂದ್ರದ ಒತ್ತಡಕ್ಕೆ ಮಣಿದಿದ್ದಾರೆ ಎಂದು ಜಯಾ ಆರೋಪಿಸಿದ್ದಾರೆ.

ನಮ್ಮ ಯೋಜನೆಗಳ ಬಗ್ಗೆ ನಿರ್ಧರಿಸಲು ಕರುಣಾನಿಧಿ ಅವರು ಕರ್ನಾಟಕಕ್ಕೆ ಹಕ್ಕುಗಳನ್ನು ನೀಡಿದ್ದಾರೆಯೇ? ಅವರು ತಕ್ಷಣವೇ ರಾಜೀನಾಮೆ ನೀಡಬೇಕು ಎಂದು ಮಂಗಳವಾರ ಜಯಾ ಒತ್ತಾಯಿಸಿದರು.

ತಮಿಳುನಾಡು ವಿಧಾನಸಭೆಯ ಪ್ರಶ್ನಾ ಅವಧಿಯಲ್ಲಿ ವಿಶೇಷ ನಿಲುವಳಿ ಗೊತ್ತುವಳಿ ಮಂಡಿಸಲು ಸ್ಪೀಕರ್ ಎ.ಅವಿದೈಯಪ್ಪನ್ ಅವರು ನಿರಾಕರಿಸಿದ ಬಳಿಕ, ಎಐಎಡಿಎಂಕೆ ಸದಸ್ಯರ ಸಭಾತ್ಯಾಗದ ನೇತೃತ್ವ ವಹಿಸಿದ ಜಯಾ ಸುದ್ದಿಗಾರರೊಂದಿಗೆ ಮಾತನಾಡುತ್ತಾ, ಯೋಜನೆ ಅನುಷ್ಠಾನಗೊಳಿಸುವ ನಿಟ್ಟಿನಲ್ಲಿ ಮಾ.27 ಹಾಗೂ ಏ.1ರಂದು ಸರ್ವಾನುಮತದ ನಿರ್ಣಯ ಕೈಗೊಳ್ಳಲಾಗಿತ್ತು. ಆದರೆ ಏ.5ರಂದು, ಸದನದ ಅಧಿವೇಶನ ಇರುವಂತೆಯೇ, ಮುಖ್ಯಮಂತ್ರಿ ಏಕಪಕ್ಷೀಯ ಹೇಳಿಕೆ ನೀಡಿ ಅಚ್ಚರಿ ಹುಟ್ಟಿಸಿದ್ದಾರೆ ಎಂದರು.

ಕರ್ನಾಟಕದ ರಾಜಧಾನಿಯಲ್ಲಿ ಮುಂಬಯಿ ಕನ್ನಡಿಗರ ಧ್ವನಿ ಮೊಳಗಿಸಲು ನಾರಾಯಣ ಗೌಡರ ಗೆಲುವು ಅಗತ್ಯ

2008-04-09T05:59:00.000-07:00

ಬೃಹನುಂಬಯಿಯಲ್ಲಿನ ಏಕೈಕ ಕನ್ನಡಿಗ ಅಭ್ಯರ್ಥಿ ನಾರಾಯಣ ಆರ್. ಗೌಡ ಇವರು ಕರ್ನಾಟಕ ರಾಜ್ಯದ ರಾಜಕಾರಣಕ್ಕೆ ಸಕ್ರೀಯರಾಗಿ ಪ್ರವೇಶಗೈದು ಬರುವ ರಾಜ್ಯ ವಿಧಾನ ಸಭಾ ಚುನಾವಣೆಯಲ್ಲಿ ತನ್ನ ಕೆ.ಆರ್.ಪೇಟೆ ಸ್ವಕ್ಷೇತ್ರದಿಂದ ಕಾಂಗ್ರೇಸ್ ಅಭ್ಯರ್ಥಿಯಾಗಿ ಸ್ಪರ್ಧಿಸುತ್ತಿರುವ ಹಿನ್ನಲೆಯಲ್ಲಿ ಅವರ ಸಮಾಜ ಬಾಂಧವರು ಮತ್ತು ಅಭಿಮಾನಿಗಳು ಇಂದಿಲ್ಲಿ ಭಾನುವಾರ ಮಧ್ಯಾಹ್ನ ಅಂಧೇರಿ ಪೂರ್ವದ ಜೆ.ಬಿ.ನಗರದಲ್ಲಿನ ಗೊಯಾಂಕ ಸಭಾಂಗಣದಲ್ಲಿ ಸಮಾಲೋಚನಾ ಸಭೆಯನ್ನು ಆಯೋಜಿಸಿತ್ತು.

ಕರ್ಮ ಭೂಮಿ ಮುಂಬಯಿಯಲ್ಲಿನ ಕನ್ನಡಿಗರ ಧ್ವನಿ ಜನ್ಮಭೂಮಿ ಕರ್ನಾಟಕದ ವಿಧಾನ ಸಭೆಯಲ್ಲಿ ಪ್ರತಿಕ್ರಿಯಿಸಲು ಗೌಡರ ವಿಜಯ ಫಲಿಸಬೇಕು. ಮಹಾರಾಷ್ಟ್ರದ ವಿಧಾನ ಸಭೆಯಲ್ಲಿ ಯಾವುದೇ ಕೆಲಸ ಸುಲಭ ಸಾಧ್ಯವಾಗಲು ರಾಜಕೀಯ ಶಕ್ತಿ ಮುಖ್ಯವಾಗಿತ್ತದೆ. ಅಂತಹ ಪ್ರಬಲ ಶಕ್ತಿಯತ್ನ ದಾಪುಕಾಲಿರಿಸಿ ಸಮಾಜ ಸೇವೆಗೈಯಲು ಮುಂದಾದ ಗೌಡರಿಗೆ ಮುಂಬಯಿ ಕನ್ನಡಿಗರನ್ನು ಕರ್ನಾಟಕದಲ್ಲಿ ಪ್ರತಿನಿದಿಸಲು ಶಾಸಕನೋರ್ವನ ಅಗತ್ಯವಿದೆ. ಮಹಾರಾಷ್ಟ್ರ ವಿಧಾನ ಸಭೆಯಲ್ಲಿ ನಾಲ್ಕು ಕನ್ನಡಿಗರು ಪ್ರತಿನಿಧಿಸುವುದರಿಂದ ಕನ್ನಡಿಗರಿಗೆ ಸಿಗುವ ನ್ಯಾಯ ಆಗುವ ಅನ್ಯಾಯದ ಬಗ್ಗೆ ತಿಳಿಯಲು ನಮ್ಮವರೇ ಇದ್ದಾರೆ. ಅಂತೆಯೇ ಕರ್ನಾಟಕದಲ್ಲಿ ನಾರಯಾಣ ಗೌಡರ ಪ್ರತಿನಿಧಿತ್ವ ನಮಗೆ ಸಹಕರಿಯಾಗಲಿದೆ ಎನ್ನುವ ಅಭಿಮತ ಸಭೆಯಲ್ಲಿ
ಚರ್ಚೆಗೊಳಪಟ್ಟಿತು.

ಸಭೆಯ ಪ್ರಾರಂಭದಲ್ಲಿ ಶ್ರೀ ಆದಿ ಚುಂಚನಗಿರಿ ಸೇವಾ ಸಮಿತಿ ಮುಂಬಯಿಯ ಪದಾಧಿಕಾರಿಗಳು ಪುಷ್ಫಹಾರವನ್ನಿತ್ತು ನಾರಾಯಣ ಗೌಡರಿಗೆ ಶುಭಹಾರಿಸಿದರು.

ಕಿಕ್ಕಿರಿದು ತುಂಬಿದ ಸಭಾಗೃಹದಲ್ಲಿ ಒಕ್ಕಲಿಗ ಸಮಾಜ, ಶ್ರೀ ಆದಿ ಚುಂಚನಗಿರಿ ಸೇವಾ ಸಮಿತಿ ಮುಂಬಯಿ, ಜಯಲಕ್ಷ್ಮೀ ಕೋ. ಆಪರೇಟಿವ್ ಕ್ರೆಡಿಟ್ ಸೊಸಾಯ್ಟಿ ಲಿಮಿಟೆಡ್ ಅಂಧೇರಿ ಅಲ್ಲದೆ ಮಹಾನಗರದ ಅನೇಕಾನೇಕ ತುಳು-ಕನ್ನಡೇತರ ಸಂಘ-ಸಂಸ್ಥೆಗಳ ಸದಸ್ಯರು ಅಧಿಕ ಸಂಖ್ಯೆಯಲ್ಲಿ ಪಾಲ್ಗೊಂಡು ನಾರಾಯಣ ಗೌಡರ ಗೆಲುವಿಗೆ ಶ್ರಮಿಸುವ ಭರವಸೆಯನ್ನಿತ್ತು ಹರಸಿದರು.

ವೇದಿಕೆಯಲ್ಲಿ ಧರ್ಮಾಧಿಕಾರಿ ಶ್ರೀ ಶನೈಶ್ವರ ಸೇವಾ ಸಮಿತಿ ಚೆಂಬೂರು, ಕೆ.ಎಂ.ರಾಮು ಸ್ವಾಮೀ, ಉದ್ಯಮಿ ಸುಭಾಶ್ ಅಗರ್‌ವಾಲ್, ನಂಜಪ್ಪ ಗೌಡ ನಾಯಕನ ಹಳ್ಳಿ, ಚಿಕ್ಕೇಗೌಡ ಸಾರಂಗಿ, ಮಂಜುನಾಥ ಇ ಗೌಡ, ಮೋಹನ್ ಗೊರೂರು, ಕೃಷ್ಣಪ್ಪ್ ಗೌಡ(ಸ್ವಾಮಿ), ರಾಜು ಬಿ ಗೌಡ, ಮೋಹನ್ ಕುಮಾರ್ ಎ. ಗೌಡ, ಪಾಪಣ್ಣ ಗೌಡ ಜೆರಿಮೆರಿ, ಪುಟ್ಟಸ್ವಾಮಿ ಗೌಡ ಸಾಂತಾಕ್ರೂಜ್, ಮಂಜುನಾಥ ಶಿಲ್ನೇರೆ, ಗುಜ್ಜೇಗೌಡ ಸೊಳ್ಲೆಪುರ, ಗುಂಡುರಾವ್ ಚಿದ್ದಲ ಮುಂತಾದವರು ಅಸೀನರಾಗಿದ್ದು ಶುಭಕೋರಿ ಮಾತನಾಡಿದರು.

ಸಭೆಯಲ್ಲಿ ಒಕ್ಕಲಿಗ ಸಮಾಜ ಮುಂಬಯಿಯ ಪದಾಧಿಕಾರಿಗಳಾದ ಕೆ.ರಾಜೇ ಗೌಡ, ರಂಗಪ್ಪ ಸಿ. ಗೌಡ, ಶೇಖರ್ ಜೆ. ಗೌಡ, ಗಂಗಾಧರ್ ಎನ್. ಗೌಡ, ಡಿ.ಎಸ್.ಮುತ್ತೇ ಗೌಡ, ಎಂ. ಎನ್.ಬೊರೇ ಗೌಡ, ಎ.ರಾಮಣ್ಣ ಕೆಂಪೇ ಗೌಡ, ಸ್ಥಳೀಯ ಕಾಂಗ್ರೇಸ್ ನಾಯಕ ಚಂದ್ರ ಶೆಟ್ಟಿ, ತುಳು-ಕನ್ನಡಿಗ ರಾಜಕೀಯ ಧುರೀಣರಾದ ಮೋರ್ಲಾ ರತ್ನಾಕರ್ ಶೆಟ್ಟಿ, ಪೇತ್ರಿ ವಿಶ್ವನಾಥ್ ಶೆಟ್ಟಿ ಅಲ್ಲದೆ ಪ್ರಮುಖ ಮುಖಂಡರು ಮುಂತಾದವರು ಹಾಜರಿದ್ದರು.

ಕೆ.ರಾಜೇ ಗೌಡ ಕಾರ್ಯಕ್ರಮ ನಿರೂಪಿಸಿ ವಂದಿಸಿದರು.

ಕರ್ನಾಟಕ ರಾಜ್ಯದ ಮಾಜಿ ಮುಖ್ಯ ಮಂತ್ರಿ, ಮಹಾರಾಷ್ಟ್ರದ ಮಾಜಿ ರಾಜ್ಯಪಾಲ ಎಸ್.ಎಂ.ಕೃಷ್ಣ, ಕರ್ನಾಟಕ ರಾಜ್ಯ ಕಾಂಗ್ರೇಸ್ (ಐ) ಪಕ್ಷದ ರಾಜ್ಯಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ, ರೆಹಮಾನ್ ಖಾನ್, ಸಂಸದ ಅಂಬರೀಶ್, ಸಿದ್ಧರಾಮಯ್ಯ, ಡಿ.ಕೆ.ಶಿವಕುಮಾರ್ ಮುಂತಾದ ಗಣ್ಯ ರಾಜಕಾರಣಿಗಳ ಪ್ರೇರಣೆಯ ಮೇರೆಗೆ ರಾಜಕೀಯ ರಂಗವನ್ನು ಪ್ರವೇಶಿಸಿದ್ದೇನೆ. ನನ್ನ ಶಾಸಕ ಸ್ಥಾನದ ವಿಜಯಕ್ಕೆ ನಿಮ್ಮೆಲ್ಲರ ಆಶೀರ್ವಾದವನ್ನು
ಆಶಿಸುತ್ತಿದ್ದೇನೆ ಎಂದು ನಾರಾಯಣ ಗೌಡರು ವಿನಯ ಪೂರ್ವಕವಾಗಿ ಕೋರಿದರು.

ಯಾರು ಏನೇ ಅನ್ನಲಿ, ಮುಂಬೈ ಬಿಡೆ: ಬಚ್ಚನ್

2008-04-09T05:57:00.000-07:00

ಮುಂಬೈ, ಮಂಗಳವಾರ, 8 ಏಪ್ರಿಲ್ 2008

ಮಹಾರಾಷ್ಟ್ರ ನವನಿರ್ಮಾಣ ಸೇನಾದ ಮುಖ್ಯಸ್ಥ ರಾಜ್ ಠಾಕ್ರೆಯ ಹೇಳಿಕೆಗೆ ಖಾರವಾಗಿ ಪ್ರತಿಕ್ರಿಯಿಸಿರುವ ಬಾಲಿವುಡ್ ಸೂಪರ್ ಸ್ಟಾರ್ ಅಮಿತಾಬ್ ಬಚ್ಚನ್, ಯಾರು ಏನೇ ಹೇಳಲಿ; ಮುಂಬೈ ಬಿಟ್ಟು ತೆರಳಲಾರೆ ಎಂದು ಹೇಳಿದ್ದಾರೆ.

ಸೇನಾ, ಸಾಮ್ನಾ ಹೇಳಿಕೆಗಳಿಂದ ಭಾವನಾತ್ಮಕವಾಗಿ ನೊಂದಿರುವ ಅಮಿತಾಬ್ ಬಚ್ಜನ್, ಸ್ಥಳೀಯ ಪತ್ರಿಕೆಯೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ, ಅವರು ಬಾಟಲಿಗಳನ್ನು ಎಸೆಯಲಿ, ಅವರು ಮೋರ್ಚಾಗಳನ್ನು ನಡೆಸಲಿ, ಅವರು ನನ್ನನ್ನು ದೂಷಿಸಲಿ ನಾನಂತೂ ಕದಲಲಾರೆ ಎಂದು ದೃಢವಾಗಿ ಹೇಳಿದ್ದಾರೆ.

ಕರ್ಮಭೂಮಿ ವಿವಾದಕ್ಕೆ ಸಂಬಂಧಿಸಿದಂತೆ ಪ್ರಥಮ ಬಾರಿಗೆ ಮೌನಮುರಿದಿರುವ ಅಮಿತಾಬ್, ತನ್ನ ಭಿತ್ತಿಚಿತ್ರಗಳಿಗೆ ಮಸಿಬಳಿದರೆ, ತನ್ನ ಸಿನಿಮಾಗಳ ಪ್ರದರ್ಶನಕ್ಕೆ ಅಡ್ಡಿಯುಂಟುಮಾಡಿದರೂ ತಾನು ಬೆದರಲಾರೆ ಎಂಬುದಾಗಿ ಎಂಎನ್ಎಸ್ ಮುಖ್ಯಸ್ಥ ಹಾಗೂ ಅವರ ಬೆಂಬಲಿಗರಿಗೆ ಸವಾಲು ಹಾಕಿದ್ದಾರೆ.

ತನ್ನ ಪ್ರತಿಷ್ಠೆ ಹಾಗೂ ಸಮಗ್ರತೆಯ ಮೇಲಿನ ದಾಳಿ, ಮತ್ತು ಮುದ್ರಣ ಮತ್ತು ವಿದ್ಯುನ್ಮಾನ ಮಾಧ್ಯಮಗಳ ಮೂಲಕ ತನ್ನ ಪ್ರತಿಷ್ಠೆಗೆ ಧಕ್ಕೆಯುಂಟುಮಾಡುವ ಯಾವುದೇ ಪ್ರಯತ್ನಗಳು, ಎಲ್ಲಾ ಅಪಸವ್ಯಗಳ ವಿರುದ್ಧದ ಹೋರಾಟಕ್ಕೆ ಇಚ್ಛಾಶಕ್ತಿಯನ್ನು ಹೆಚ್ಚಿಸುತ್ತದೆ ಎಂದು ಹೇಳಿದ್ದಾರೆ.

ಚಳವಳಿಗೆ ಐಟಿ-ಬಿಟಿಯ ಬೆಂಬಲ ಬೇಕು: ಕರವೇ

2008-04-07T09:46:00.000-07:00

ತಮಿಳುನಾಡಿನಲ್ಲಿರುವ ಕನ್ನಡಿಗರ ಆಸ್ತಿ ಪಾಸ್ತಿಗೆ ನಷ್ಟ ಉಂಟು ಮಾಡಿ ಅವರ ನೆಮ್ಮದಿಗೆ ಭಂಗ ತರುತ್ತಿರುವ ತಮಿಳರನ್ನು ಬಂಧಿಸಿ ಎಂದು ತಮಿಳುನಾಡು ಸರ್ಕಾರವನ್ನು ಕರ್ನಾಟಕ ರಕ್ಷಣಾ ವೇದಿಕೆ ಶುಕ್ರವಾರ ಆಗ್ರಹಿಸಿದೆ.

ಕನ್ನಡಿಗರ ಒಡೆತನದ ಹೋಟೆಲ್ ಮತ್ತಿತರ ಸಂಸ್ಥೆಗಳ ಮೇಲೆ ದಾಳಿ ಮಾಡಿರುವವರನ್ನು ತಮಿಳುನಾಡು ಸರ್ಕಾರ ತಕ್ಷಣ ಬಂಧಿಸಬೇಕು. ತಮಿಳುನಾಡಿನ ಕನ್ನಡಿರಿಗೆ ರಕ್ಷಣೆ ನೀಡಲು ಕೇಂದ್ರ ಸರ್ಕಾರ ಮಧ್ಯಸ್ಥಿಕೆ ವಹಿಸಬೇಕು ಎಂದು ಕರವೇ ರಾಜ್ಯಾಧ್ಯಕ್ಷ ಟಿ.ಎ.ನಾರಾಯಣ ಗೌಡ ಇಂದು ಪತ್ರಿಕಾಗೋಷ್ಠಿಯಲ್ಲಿ ಕೇಂದ್ರ ಮತ್ತು ತಮಿಳು ಸರ್ಕಾರಗಳನ್ನು ಆಗ್ರಹಿಸಿದರು.

ಏ.10ರ ಕರ್ನಾಟಕ ಬಂದ್‌ಗೆ ಎಲ್ಲ ರಾಜಕೀಯ ಪಕ್ಷಗಳು ಬೆಂಬಲ ಕೊಡಬೇಕು. ಹಾಗೆಯೇ ಐಟಿ ಬಿಟಿ ವಲಯದವರೂ ಬಂದ್‌ಗೆ ತಮ್ಮ ಬೆಂಬಲ ಸೂಚಿಸಬೇಕು. ಅಂದು ಕೇಂದ್ರ ಸರ್ಕಾರಿ ಹಾಗೂ ಕೇಂದ್ರ ಸರ್ಕಾರಿ ಸ್ವಾಮ್ಯದ ಕಚೇರಿಗಳನ್ನು ಮುಚ್ಚಿ ಬಂದ್‌ಗೆ ಸಹಕರಿಸಬೇಕು ಎಂದು ಕರವೇ ಕರೆ ಕೊಟ್ಟಿದೆ. ಬಂದ್ ನಡೆಸುವ ಮೂಲಕ ತಮಿಳುನಾಡು ಮತ್ತು ಕೇಂದ್ರ ಸರ್ಕಾರಕ್ಕೆ ಸ್ಪಷ್ಟ ಸಂದೇಶ ಕಳುಹಿಸಲಾಗುವುದು. ತಮಿಳುನಾಡು ಸರ್ಕಾರ ಹೊಗೇನಕಲ್ ಯೋಜನೆಯನ್ನು ಕೈಬಿಡಬೇಕೆಂದು ಆಗ್ರಹಿಸಿ ಕರವೇ ಏ.10ರಂದು ಬೆಂಗಳೂರಿನಲ್ಲಿ ಹಾಗೂ ಏ.14ರಂದು ಕೊಳ್ಳ್ಳೆಗಾಲದಲ್ಲಿ ಪ್ರತಿಭಟನಾ ಮೆರವಣಿಗೆ ನಡೆಸಲಿದೆ ಎಂದು ನಾರಾಯಣ ಗೌಡರು ತಿಳಿಸಿದರು.

ಹೊಗೇನಕಲ್‌ಗೆ ಜಯ ಕರ್ನಾಟಕದ ಜಾಥಾ

2008-04-07T09:45:00.001-07:00

ಹೊಗೇನಕಲ್ ಜಲ ವಿವಾದವನ್ನು ಖಂಡಿಸಿ 'ಜಯ ಕರ್ನಾಟಕ ' ಸಂಘಟನೆಯ ಗೌರವಾಧ್ಯಕ್ಷ ಮುತ್ತಪ್ಪ ರೈ ನೇತೃತ್ವದಲ್ಲಿ ಬೃಹತ್ ಪ್ರತಿಭಟನಾ ಮೆರವಣಿಗೆ ಶುಕ್ರವಾರ ಹೊಗೇನಕಲ್‌ಗೆ ಹೊರಡಿತು.

ಶುಕ್ರವಾರ ಬೆಳಗ್ಗೆ 9ಗಂಟೆಗೆ ಕಾರ್ಪೊರೇಷನ್ ವೃತ್ತದ ಸಮೀಪ ಇರುವ ಕೆಂಪೇಗೌಡ ಪ್ರತಿಮೆಗೆ ಮಾಲಾರ್ಪಣೆ ನಡೆಸಿ ಸುಮಾರು 500 ವಾಹನಗಳಲ್ಲಿ 3 ಸಾವಿರಕ್ಕೂ ಹೆಚ್ಚು ಕಾರ್ಯಕರ್ತರು 'ಜಲ ಜಾಗೃತಿ-ಜನ ಜಾಗೃತಿ' ಜಾಥಾವನ್ನು ಆರಂಭಿಸಿದರು.

ಪ್ರತಿಭಟನಾ ಮೆರವಣಿಗೆಯು ಬಿಡದಿ, ರಾಮನಗರ, ಚನ್ನಪಟ್ಟಣ, ಮಂಡ್ಯ, ಮೈಸೂರು ಮುಖಾಂತರ ಹೊಗೇನಕಲ್‌ಗೆ ತೆರಳಿದೆ. ಏ.4ರಂದು ಮೈಸೂರಿನಲ್ಲಿ ತಂಗಿ ಏ.5ರಂದು ಹೊಗೇನಕಲ್‌ಗೆ ತೆರಳಿ ಅಲ್ಲಿ ತಮಿಳುನಾಡು ಮುಖ್ಯಮಂತ್ರಿ ಕರುಣಾನಿಧಿ ಪ್ರತಿಕೃತಿಯನ್ನು ದಹಿಸಿ ಪ್ರತಿಭಟನೆ ನಡೆಸಲಾಗುವುದು ಎಂದು ಮುತ್ತಪ್ಪ ರೈ ಹೇಳಿದರು.

ಹೊಗೇನಕಲ್ ಜಲವಿವಾದ ಸಂಬಂಧ ಕರುಣಾನಿಧಿ ನೀಡಿರುವ ಹೇಳಿಕೆಯು ಕನ್ನಡಿಗರ ಆತ್ಮಾಭಿಮಾನಕ್ಕೆ ಧಕ್ಕೆ ಉಂಟು ಮಾಡಿದೆ. ಈ ಸಮಸ್ಯೆಯನ್ನು ಶಾಂತಿಯುತವಾಗಿ ಬಗೆಹರಿಸಬೇಕು. ಪ್ರತಿಭಟನೆಯ ವೇಳೆ ಯಾವುದೇ ಅಹಿತಕರ ಘಟನೆ ನಡೆಯದಂತೆ ನೋಡಿಕೊಳ್ಳಲಾಗುವುದು ಎಂದು ಮುತ್ತಪ್ಪರೈ ತಿಳಿಸಿದರು.

ಕರುಣಾನಿಧಿ ನಿರ್ಧಾರಕ್ಕೆ ತಮಿಳರ ಆಕ್ರೋಶ

2008-04-07T09:41:00.000-07:00

ಹೊಗೇನಕಲ್ ಯೋಜನೆಯನ್ನು ತಾತ್ಕಾಲಿಕವಾಗಿ ನಿಲ್ಲಿಸುವುದಾಗಿ ಘೋಷಿಸಿರುವ ತಮಿಳುನಾಡು ಸರ್ಕಾರದ ನಿರ್ಧಾರವನ್ನು ತಮಿಳರು ತೀವ್ರವಾಗಿ ಖಂಡಿಸಿದ್ದಾರೆ. ಕರುಣಾನಿಧಿ ಅವರ ನಿರ್ಧಾರವನ್ನು ವಿರೋಧಿಸಿ ಹೊಸೂರಿನಲ್ಲಿ ಶನಿವಾರ ಸಂಪೂರ್ಣ ಬಂದ್ ಆಚರಿಸಲಾಯಿತು.

ಹಠಾತ್ ಬಂದ್ ಕಾರಣ ಹೊಸೂರು ಪಟ್ಟಣದಲ್ಲಿನ ಎಲ್ಲ ವ್ಯಾಪಾರ ವಹಿವಾಟುಗಳು, ಅಂಗಡಿ ಮುಂಗಟ್ಟುಗಳನ್ನು ಮುಚ್ಚಲಾಯಿತು. ಮಾಜಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಹಾಗೂ ಲೋಕಸಭೆ ವಿರೋಧ ಪಕ್ಷದ ನಾಯಕ ಎಲ್.ಕೆ.ಆಡ್ವಾಣಿ ಅವರ ಪ್ರತಿಕೃತಿಗಳನ್ನು ದಹಿಸಿ ಕರ್ನಾಟಕ ವಿರೋಧಿ ಘೋಷಣೆಗಳನ್ನು ಕೂಗಲಾಯಿತು.

ಹೊಗೇನಕಲ್ ಕಾಮಗಾರಿಯನ್ನು ತಮಿಳುನಾಡು ತಾತ್ಕಾಲಿಕವಾಗಿ ನಿಲ್ಲಿಸಿರುವುದರಿಂದ ರೊಚ್ಚಿಗೆದ್ದ ತಮಿಳರು ಹೊಸೂರಿನಲ್ಲಿ ಕೆ‌ಎಸ್‌ಆರ್‌ಟಿಸಿ ಬಸ್‌ ಒಂದನ್ನು ಸುಟ್ಟು ಹಾಕಿದ್ದಾರೆ. ಪರಿಸ್ಥಿತಿ ನಿಯಂತ್ರಣಕ್ಕೆ ಬರುವವರೆಗೂ ಹೊಸೂರು ಮತ್ತು ಕರ್ನಾಟಕ ನಡುವಿನ ವಾಹನ ಸಂಚಾರವನ್ನು ನಿಲ್ಲಿಸಿರುವುದಾಗಿ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ. ಹೊಸೂರಿನಲ್ಲಿ ಕೆ‌ಎಸ್‌ಆರ್‌ಟಿಸಿ ಬಸ್ ಸುಟ್ಟಿರುವುದನ್ನು ಕರ್ನಾಟಕ ರಕ್ಷಣಾ ವೇದಿಕೆ ತೀವ್ರವಾಗಿ ಖಂಡಿಸಿದೆ. ಕನ್ನಡಿಗರ ಮೇಲಿನ ದಬ್ಬಾಳಿಕೆಯನ್ನು ಸಹಿಸುವುದಿಲ್ಲ. ಹೋರಾಟವನ್ನು ಮತ್ತಷ್ಟು ತೀವ್ರಗೊಳಿಸುವುದಾಗಿ ಕರವೇ ಎಚ್ಚರಿಸಿದೆ.

ಹೊಗೇನಕಲ್ ಯೋಜನೆಯನ್ನು ವಿರೊಧಿಸಿ ಪ್ರತಿಭಟಿಸಲು ಮುತ್ತಪ್ಪ ರೈ ನೇತೃತ್ವದ 'ಜೈ ಕರ್ನಾಟಕ' ಸಂಘಟನೆಯ 1000ಕ್ಕೂ ಅಧಿಕ ಕಾರ್ಯಕರ್ತರು ಕೊಳ್ಳೇಗಾಲ, ಮಲೆಮಹದೇಶ್ವರ ಬೆಟ್ಟದ ಮೂಲಕ ಹೊಗೇನಕಲ್‌ಗೆ ಶನಿವಾರ ಬರುತ್ತಿದ್ದಾರೆ. ಅವರು ಹೊಗೇನಕಲ್‌ಗೆ ಬಂದ ಕೂಡಲೆ ಅವರನ್ನು ಬಂಧಿಸುವುದಾಗಿ ಸೇಲಂನ ಪೊಲೀಸ್ ಸೂಪರಿಂಟೆಂಡೆಂಟ್ ಎಸ್.ಪಿ.ಭಾಸ್ಕರನ್ ತಿಳಿಸಿದ್ದಾರೆ.

ಹೊಟೇಲು ಉದ್ಯಮಿಗಳ ಬೃಹತ್ ಪ್ರತಿಭಟನೆ

2008-04-07T09:39:00.000-07:00

ಕನ್ನಡ ನಾಡಲ್ಲಿ ಹುಟ್ಟಿ ಹೊಟ್ಟೆಪಾಡಿಗಾಗಿ ತಮಿಳುನಾಡಿಗೆ ವಲಸೆ ಹೋಗಿರುವ ಚಿತ್ರನಟರಾದ ರಜನೀಕಾಂತ್, ಅರ್ಜುನ್ ಸರ್ಜಾ, ಪ್ರಕಾಶ್ ರೈ ಇವರುಗಳು ಕನ್ನಡಿಗರು ಮತ್ತು ತಮಿಳರ ನಡುವಿನ ಬಾಂಧವ್ಯ ವೃದ್ಧಿ ಮಾಡುವ ಬದಲಿಗೆ ತಮಿಳುನಾಡಿನ ಪರವಾಗಿ ನಡೆದುಕೊಂಡಿರುವುದು ಖಂಡನೀಯ ಎಂದು ಕನ್ನಡ ಸಾಹಿತ್ಯ ಪರಿಷತ್ನ ಕೋಶಾಧಿಕಾರಿ ಹಾಗೂ ಹೊಟೇಲು ಸಹಕಾರಿ ಬ್ಯಾಂಕ್ ಅಧ್ಯಕ್ಷ ಪುಂಡಲೀಕ ಹಾಲಂಬಿ ಕಿಡಿಕಾರಿದ್ದಾರೆ.

ಶನಿವಾರ ಮೈಸೂರು ಬ್ಯಾಂಕ್ ವೃತ್ತದಲ್ಲಿ ಬೆಂಗಳೂರು ಹೊಟೇಲುಗಳ ಸಂಘ ಆಯೋಜಿಸಿದ್ದ ಬೃಹತ್ ಪ್ರತಿಭಟನಾ ಪ್ರದರ್ಶನವನ್ನುದ್ದೇಶಿಸಿ ಅವರು ಮಾತನಾಡಿದರು. ವಿನಾಕಾರಣ ಕನ್ನಡಿಗರ ಭಾವನೆಗಳನ್ನು ಕೆರಳಿಸುವಂತಹ ಹೇಳಿಕೆಯನ್ನು ನೀಡಿರುವುದೇ ಅಲ್ಲದೇ ಎರಡೂ ರಾಜ್ಯಗಳು ಹೊತ್ತಿ ಉರಿಯುವಂತಹ ಸನ್ನಿವೇಶವನ್ನು ನಿರ್ಮಾಣ ಮಾಡಿರುವ ತಮಿಳುನಾಡು ಮುಖ್ಯಮಂತ್ರಿ ಎಂ.ಕರುಣಾನಿಧಿಯವರ ನಡವಳಿಕೆಯನ್ನು ಅವರು ಖಂಡಿಸಿದರು.

ಪ್ರತಿಭಟನೆಯಲ್ಲಿ ಹಾಜರಿದ್ದ ಬೆಂಗಳೂರು ಹೊಟೇಲುಗಳ ಸಂಘದ ಕಾರ್ಯದರ್ಶಿ ಪಿ.ಸಿ.ರಾವ್‌ ಅವರು ಮಾತನಾಡುತ್ತಾ, ದೇಶದೆಲ್ಲೆಡೆ ಹೊಟೇಲುಗಳನ್ನು ಸ್ಥಾಪಿಸಿ ಶುಚಿ-ರುಚಿಯಾದ ಊಟೋಪಹಾರಗಳನ್ನು ಒದಗಿಸುವ ಮೂಲಕ ಗ್ರಾಹಕರ ಸೇವೆಯನ್ನು ಮಾಡುತ್ತಿರುವ ಹೊಟೇಲು ಉದ್ಯಮದವರ ಮೇಲೆ ನಡೆದಿರುವ ಈ ಬಗೆಯ ದಾಳಿಯ ಕುರಿತು ತೀವ್ರ ಆತಂಕ ವ್ಯಕ್ತಪಡಿಸಿ, ಇದು ಕೇವಲ ಅವರೊಬ್ಬರ ಮೇಲೆ ನಡೆದಿರುವ ದಾಳಿಯಲ್ಲ, ಸಮಗ್ರ ಕನ್ನಡಿಗರ ಸ್ವಾಭಿಮಾನಕ್ಕೆ ಬಿದ್ದಿರುವ ಪೆಟ್ಟು ಎಂದು ಅಭಿಪ್ರಾಯಪಟ್ಟರು.

ಈ ಸಂದರ್ಭದಲ್ಲಿ ಹೊಟೇಲು ಉದ್ಯಮಿಗಳಾದ ಪಿ.ಸಿ.ರಾವ್, ನಾಗರಾಜ ಧನ್ಯ, ಮಧುಕರ ಶೆಟ್ಟಿ, ಬೇಳೂರು ರಾಘವೇಂದ್ರ ಶೆಟ್ಟಿ, ರಾಜೀವ್ ಶೆಟ್ಟಿ ಮೊದಲಾದವರು ಉಪಸ್ಥಿತರಿದ್ದರು.

ರಾಜ್ಯ ಬಂದ್ ರದ್ದುಗೊಳಿಸಲು ನಿರ್ಧಾರ

2008-04-07T09:36:00.000-07:00

ರಾಜ್ಯದಲ್ಲಿ ನೂತನ ಸರಕಾರ ಅಸ್ತಿತ್ವಕ್ಕೆ ಬರುವತನಕ ಹೊಗೇನಕಲ್ ಯೋಜನೆಯನ್ನು ತಡೆಹಿಡಿಯಲಾಗುವುದು ಎಂದು ತಮಿಳುನಾಡು ಮುಖ್ಯಮಂತ್ರಿ ಎಂ. ಕರುಣಾನಿಧಿ ಹೇಳಿಕೆ ನೀಡಿರುವ ಹಿನ್ನೆಲೆಯಲ್ಲಿ ಕನ್ನಡಪರ ಸಂಘಟನೆಗಳು ಏಪ್ರಿಲ್ 10ರಂದು ಕರೆದಿರುವ ರಾಜ್ಯ ಬಂದ್ ರದ್ದುಗೊಳಿಸಲು ನಿರ್ಧರಿಸಿದೆ.

ಶನಿವಾರ ಕರುಣಾನಿಧಿ ಹೇಳಿಕೆ ಹೊರಬೀಳುತ್ತಿರುವಂತೆ ತುರ್ತು ಸಭೆ ನಡೆಸಿದ ಕನ್ನಡ ಪರ ಸಂಘಟನೆಗಳು ಈ ನಿರ್ಧಾರಕ್ಕೆ ಬಂದಿವೆ. ಸಭೆಯಲ್ಲಿ ಕನ್ನಡ ರಕ್ಷಣಾ ವೇದಿಕೆ ಅಧ್ಯಕ್ಷ ಟಿ.ಎ. ನಾರಾಯಣ ಗೌಡ, ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷರಾದ ಚಂದ್ರಶೇಖರ್ ಪಾಟೀಲ್ ಸೇರಿದಂತೆ ಅನೇಕ ಕನ್ನಡಪರ ಸಂಘಟನೆಗಳ ಸದಸ್ಯರು ಭಾಗವಹಿಸಿದ್ದರು.

ಕನ್ನಡ ಪರ ಸಂಘಟನೆಗಳು ಬಂದ್ ರದ್ದುಗೊಳಿಸಿದ್ದರೂ, ಹೋರಾಟ ಮಾತ್ರ ಮುಂದುವರಿಯಲಿದೆ. ತಮಿಳು ಚಿತ್ರ ಪ್ರದರ್ಶನಕ್ಕೆ ರಾಜ್ಯದಲ್ಲಿ ಅವಕಾಶ ನೀಡುವುದಿಲ್ಲ ಎಂದು ಸಂಘಟನೆ ತಿಳಿಸಿದೆ. ಅಲ್ಲದೆ, ಹೊಗೇನಕಲ್ ಯೋಜನೆಗೆ ತಮಿಳುನಾಡು ಮತ್ತೆ ಚಾಲನೆ ನೀಡಿದರೆ, ಉಗ್ರ ಹೋರಾಟ ನಡೆಸುವುದಾಗಿ ಕನ್ನಡ ಪರ ಸಂಘಟನೆಗಳು ಎಚ್ಚರಿಕೆ ನೀಡಿದೆ.

ಈ ಮೂಲಕ ಕಳೆದ ನಾಲ್ಕು ದಿನಗಳಿಂದ ಹೊಗೇನಕಲ್ ಯೋಜನೆಯ ಕುರಿತು ಕರುಣಾನಿಧಿ ನೀಡಿದ್ದ ಹೇಳಿಕೆ ಎರಡು ರಾಜ್ಯಗಳಲ್ಲಿಯೂ ಹಿಂಸಾಚಾರಕ್ಕೆ ತಿರುಗಿದ್ದು, ಕರುಣಾನಿಧಿ ತಾತ್ಕಾಲಿಕ ಸ್ಥಗಿತವನ್ನು ಘೋಷಿಸಿರುವ ಹಿನ್ನೆಲೆಯಲ್ಲಿ ಬೆಂಕಿಯಾಗಿದ್ದ ಹೊಗೆ ಸ್ವಲ್ಪ ತಣ್ಣಗಾಗಿದೆ.

900 ರಿಲಯನ್ಸ್ ಪೆಟ್ರೋಲ್ ಬಂಕ್ ಸದ್ಯದಲ್ಲೇ ಬಂದ್

2008-04-06T22:50:00.000-07:00

ಪಿಟಿ‌ಐ, ನವದೆಹಲಿ, ಮಾ.೨೫- ದೇಶಾದ್ಯಂತ ತನ್ನ 1400 ಪೆಟ್ರೋಲ್ ಬಂಕ್‌ಗಳಲ್ಲಿ 900 ಬಂಕ್‌ಗಳನ್ನು ಸದ್ಯದಲ್ಲೇ ಸ್ಥಗಿತಗೊಳಿಸಲು ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ ನಿರ್ಧರಿಸಿದೆ. ಇದರಿಂದ 55,000 ಮಂದಿ ಉದ್ಯೋಗ ಕಳೆದುಕೊಳ್ಳುವ ಭೀತಿ ಎದುರಿಸುತ್ತಿದ್ದಾರೆ.

ಹೆಚ್ಚುತ್ತಿರುವ ನಷ್ಟ ತಪ್ಪಿಸಲು ರಿಲಯನ್ಸ್ ಈ ನಿರ್ಧಾರಕ್ಕೆ ಬಂದಿದೆ. ಆದರೆ, ಇಷ್ಟು ದಿನ ನಷ್ಟವಾಗಿರುವುದು ಹಾಗೂ ಮುಂದೆಯೂ ನಷ್ಟ ಅನುಭವಿಸುವುದು ರಿಲಯನ್ಸ್ ಅನ್ನು ನಂಬಿ ಹಣ ಹೂಡಿಕೆ ಮಾಡಿದ ಷೇರುದಾರರೇ ವಿನಃ ಕಂಪನಿಯ ಮಾಲಿಕ ಮುಖೇಶ್ ಅಂಬಾನಿಯಲ್ಲ.

ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳ ಬಂಕ್‌ಗಳಲ್ಲಿ ಮಾರಾಟ ಮಾಡುವ ಪೆಟ್ರೋಲ್ ಹಾಗೂ ಡೀಸೆಲ್‌ಗೆ ಸರ್ಕಾರದಿಂದ ಸಬ್ಸಿಡಿ ಸಿಗುತ್ತದೆ. ಆದರೆ, ರಿಲಯನ್ಸ್ ಉತ್ಪನ್ನಗಳಿಗೆ ಯಾವ ಸಬ್ಸಿಡಿಯೂ ಇಲ್ಲ.

ಇದರಿಂದಾಗಿ ಕಂಪನಿಯು ಪ್ರತಿ ಲೀಟರ್ ಪೆಟ್ರೋಲ್‌ಗೆ ೩.೪ ರು. ಹಾಗೂ ಡೀಸೆಲ್‌ಗೆ ೫.೮ ರು. ನಷ್ಟ ಅನುಭವಿಸುತ್ತಿತ್ತು.

ಪೂರ್ಣ ಪ್ರಮಾಣದಲ್ಲಿ ರಿಲಯನ್ಸ್ ಒಡೆತನದಲ್ಲಿರುವ ಬಂಕ್‌ಗಳು, ಅಂದರೆ ೯೦೦ ಬಂಕ್‌ಗಳು ಮಾತ್ರ ಸ್ಥಗಿತಗೊಳ್ಳಲಿವೆ. ಇನ್ನುಳಿದ ೫೦೦ ಬಂಕ್‌ಗಳನ್ನು ಡೀಲರ್‌ಗಳಿಗೆ ನೀಡಿರುವುದರಿಂದ ಅವು ಇನ್ನು ಮುಂದೆಯೂ ಕಾರ್ಯ ನಿರ್ವಹಿಸಲಿವೆ.

ಸರ್ಕಾರಿ ಸ್ವಾಮ್ಯದ ಹಿಂದುಸ್ತಾನ್ ಪೆಟ್ರೋಲಿಯಂ, ಭಾರತ್ ಪೆಟ್ರೋಲಿಯಂ ಮತ್ತು ಇಂಡಿಯನ್ ಆಯಿಲ್ ಕಂಪನಿಗಳೂ ಪ್ರತಿ ಲೀಟರ್ ಪೆಟ್ರೋಲಿಗೆ ೧೦.೯೩ ರು. ಹಾಗೂ ಡೀಸೆಲ್‌ಗೆ ೧೪.೬೬ ರು. ನಷ್ಟ ಅನುಭವಿಸುತ್ತಿವೆ. ಆದರೆ, ಸರ್ಕಾರ ಬಾಂಡ್‌ಗಳ ಮೂಲಕ ಆ ನಷ್ಟವನ್ನು ಭರಿಸುತ್ತಿದೆ.

ಇದೇ ವೇಳೆ, ೧೧೦೦ ಪೆಟ್ರೋಲ್ ಬಂಕ್‌ಗಳನ್ನು ಹೊಂದಿರುವ ಎಸ್ಸಾರ್ ಆಯಿಲ್ ಮತ್ತು ಅದಕ್ಕಿಂತ ಹೆಚ್ಚು ಬಂಕ್‌ಗಳನ್ನು ಹೊಂದಿರುವ ಶೆಲ್ ಕಂಪನಿಗಳು ಬಂಕ್ ಮುಚ್ಚುವ ಬಗ್ಗೆ ಯಾವುದೇ ನಿರ್ಧಾರ ಕೈಗೊಂಡಿಲ್ಲ.

ಕೈಸುಟ್ಟುಕೊಂಡ ಮುಖೇಶ್: ದೇಶದಲ್ಲೇ ಅತಿ ದೊಡ್ಡ ತೈಲೋತ್ಪನ್ನ ಘಟಕ ಹೊಂದಿರುವ ಉದ್ಯಮಿ ಮುಖೇಶ್ ಅಂಬಾನಿ. ಅವರು ೪೦೦೦ ಕೋಟಿ ರು. ಬಂಡವಾಳ ತೊಡಗಿಸಿ ಕೆಲ ವರ್ಷಗಳ ಹಿಂದೆ ಆರಂಭಿಸಿದ ಪೆಟ್ರೋಲ್ ಬಂಕ್‌ಗಳೇ ಈಗ ನಷ್ಟದಿಂದ ಬಾಗಿಲು ಮುಚ್ಚುತ್ತಿವೆ. ಈ ಬಂಕ್‌ಗಳಿಗೆ ತೈಲ ಪೂರೈಸುವ ಗುತ್ತಿಗೆ ಪಡೆದಿದ್ದ ೩,೭೪೫ ಟ್ರಕ್‌ಗಳೂ ಕೆಲಸವಿಲ್ಲದೆ ನಿಲ್ಲಲಿವೆ.

ರಿಲಯನ್ಸ್ ಬಂಕ್‌ಗಳ ಸ್ಥಗಿತದ ಪರಿಣಾಮ ಸರ್ಕಾರದ ಮೇಲೂ ಬೀಳಲಿದೆ. ಸರ್ಕಾರಿ ಸ್ವಾಮ್ಯದ ಬಂಕ್‌ಗಳ ಮೇಲಿನ ಒತ್ತಡ ಹೆಚ್ಚುವುದರಿಂದ ವಾರ್ಷಿಕ ಸುಮಾರು ೪೦೦೦ ಕೋಟಿ ರು. ಹೊರೆ ಕೇಂದ್ರ ಸರ್ಕಾರದ ಮೇಲೆ ಬೀಳಲಿದೆ.

ಬೃಹತ್ ಬಂಡವಾಳ ಹೂಡಿಕೆಯೊಂದಿಗೆ ಆರಂಭವಾಗುವ ಖಾಸಗಿ ಕಂಪನಿಗಳು ತಮಗೆ ನಷ್ಟವಾಯಿತು ಎಂದರೆ ಏಕಾ‌ಏಕಿ ಬಾಗಿಲು ಹಾಕುವ ನಿರ್ಧಾರಕ್ಕೆ ಬಂದುಬಿಡುತ್ತವೆ. ಆಗ ಸಾವಿರಗಟ್ಟಲೆ ಸಂಖ್ಯೆಯಲ್ಲಿ ಸಂಬಳದಾರರು ಬೀದಿಗೆ ಬರುತ್ತಾರೆ. ಸರ್ಕಾರಿ ಸ್ವಾಮ್ಯದ ಕಂಪನಿಗಳು ಈ ರೀತಿ ಸ್ಥಗಿತಗೊಂಡರೆ ಪ್ರತಿಭಟನೆಗಳು ನಡೆಯುತ್ತವೆ. ಆದರೆ, ಖಾಸಗಿ ಕಂಪನಿಗಳ ಮಾಲಿಕರು ಅವುಗಳಿಗೆಲ್ಲ ಕಿವಿಗೊಡುವುದಿಲ್ಲ.

ರಜನಿ ಸಿನಿಮಾಗಳ ಬಹಿಷ್ಕಾರಕ್ಕೆ ಕರೆ

2008-04-06T22:41:00.000-07:00

ವಿವಾದಾಸ್ಪದ ಹೊಗೇನಕಲ್ ವಿವಾದಕ್ಕೆ ಸಂಬಂಧಿಸಿದಂತೆ, ಸೂಪರ್‌ಸ್ಟಾರ್ ರಜನಿಕಾಂತ್ ಹೇಳಿಕೆಯಿಂದ ಆಕ್ರೋಶಗೊಂಡಿರುವ ಕನ್ನಡ ಪರ ಸಂಘಟನೆಗಳು, ರಜನಿಕಾಂತ್ ನಟಿಸಿರುವ ತಮಿಳು ಸಿನಿಮಾಗಳನ್ನು ಬಹಿಷ್ಕರಿಸಬೇಕು ಎಂದು ರಾಜ್ಯದ ಜನತೆಗೆ ಕರೆ ನೀಡಿದ್ದಾರೆ.

"ರಜನಿಕಾಂತ್ ನಟಿಸಿರುವ ಸಿನಿಮಾಗಳನ್ನು ರಾಜ್ಯದಲ್ಲಿ ಪ್ರದರ್ಶಿಸಲು ಬಿಡಲಾರೆವು ಮತ್ತು ಅವರು ರಾಜ್ಯಕ್ಕೆ ಕಾಲಿಡಲು ಅವಕಾಶ ನೀಡವು" ಎಂದು ಕರ್ನಾಟಕ ಗಡಿ ರಕ್ಷಣಾ ಸಮಿತಿಯಡಿ ಬರುವ ವಿವಿಧ ಸಂಘಟನೆಗಳ ನೇತೃತ್ವ ವಹಿಸಿರುವ ವಾಟಾಳ್ ನಾಗರಾಜ್ ಹೇಳಿದ್ದಾರೆ.

ರಜನಿಕಾಂತ್ ಕರ್ನಾಟಕದವರಲ್ಲ, ಅವರು ಮಹಾರಾಷ್ಟ್ರದವರು, ಅವರಿಗೆ ಈ ಹಿಂದೆ ಕರ್ನಾಟಕ ಆಶ್ರಯ ನೀಡಿತ್ತು ಎಂದು ಅವರು ಸಮಿತಿ ಸಭೆಯ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡುತ್ತಾ ನುಡಿದರು.

'ಹೊಗೆ'ಯ ಬೆಂಕಿಗೆ ಕರುಣಾನಿಧಿಯಿಂದ ತುಪ್ಪ

2008-04-04T09:14:00.000-07:00

ಸೇತು ನಿರ್ಮಿಸುವುದಕ್ಕಾಗಿ ಶ್ರೀರಾಮ ಯಾವ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಓದಿದ್ದ ಎಂದು ಪ್ರಶ್ನಿಸಿ ಗಮನ ಸೆಳೆದಿದ್ದ ವಯೋವೃದ್ಧ ತಮಿಳುನಾಡು ಮುಖ್ಯಮಂತ್ರಿ ಎಂ.ಕರುಣಾನಿಧಿ ಮತ್ತೊಮ್ಮೆ ತಮ್ಮ ನಾಲಿಗೆ ಸಡಿಲ ಮಾಡಿದ್ದಾರೆ. ಕರ್ನಾಟಕದವರು ತಮ್ಮ ಬೆನ್ನುಮೂಳೆ ಮುರಿದರೂ, ಹೊಗೇನಕಲ್ ಯೋಜನೆಯನ್ನು ಪೂರ್ಣಗೊಳಿಸಿಯೇ ಸಿದ್ಧ ಎಂಬ ಉಡಾಫೆಯ, ಪ್ರಚೋದಕ ಮಾತುಗಳನ್ನಾಡಿದ್ದಾರೆ. ಈ ಮಾತುಗಳ ಮೂಲಕ ಅವರು, ರಾಜಕೀಯದಲ್ಲಿ ಇಷ್ಟು ವರ್ಷ ಪಳಗಿಯೂ, ಒಬ್ಬ ಜವಾಬ್ದಾರಿಯುತ ಮುಖ್ಯಮಂತ್ರಿಯಾಗಿ, ತಮ್ಮ ಸ್ಥಾನಕ್ಕೇ ಕಳಂಕ ತಂದುಕೊಂಡಿದ್ದಾರೆ.

ಕಾವೇರಿ ನದಿಯು ತಮಿಳುನಾಡನ್ನು ಪ್ರವೇಶಿಸುವ ತಾಣವಾದ ಕರ್ನಾಟಕದ ಹೊಗೇನಕಲ್‌ನಲ್ಲಿ ಜಲಾಶಯ ಕಟ್ಟಿ ತಮಿಳುನಾಡಿನ ಧರ್ಮಪುರಿ ಮತ್ತು ಕೃಷ್ಣಗಿರಿ ಪ್ರದೇಶಗಳಿಗೆ ನೀರುಣಿಸುವುದು ಡಿಎಂಕೆ ನೇತೃತ್ವದ ಸಮ್ಮಿಶ್ರ ಸರಕಾರದ ಯೋಜನೆ. ಇದು ಜಪಾನಿನ ಬ್ಯಾಂಕ್ ಆಫ್ ಇಂಟರ್‌ನ್ಯಾಷನಲ್ ಕೋಆಪರೇಶನ್ ಸಹಯೋಗದಲ್ಲಿ ತಮಿಳುನಾಡು ನಡೆಸುತ್ತಿರುವ 1334 ಕೋಟಿ ರೂ.ಗಳ ಯೋಜನೆಯೂ ಹೌದು. ಏನೇ ಆದರೂ ಇದನ್ನು ಪೂರ್ಣಗೊಳಿಸಿಯೇ ಸಿದ್ಧ ಎಂದಿದ್ದಾರೆ ಕರುಣಾನಿಧಿ.

ಏನಿದು ಹೊಗೇನಕಲ್ ಹೊಗೆ?

1334 ಕೋಟಿ ರೂ.ಗಳ ಜಪಾನ್ ಸಹಯೋಗದ ಹೊಗೇನಕಲ್ ಯೋಜನೆಯು, ತಮಿಳುನಾಡಿನ ಕೃಷ್ಣಗಿರಿ ಮತ್ತು ಧರ್ಮಪುರಿ ಜಿಲ್ಲೆಗಳ ಬಂಜರುಪ್ರದೇಶದ 40.4 ಲಕ್ಷ ಜನರಿಗೆ ದಿನವೊಂದಕ್ಕೆ 160 ದಶಲಕ್ಷ ಲೀಟರ್ ವೀರು ವಿತರಿಸುವ ಉದ್ದೇಶ ಹೊಂದಿದೆ. ಜಪಾನ್ ಬ್ಯಾಂಕ್ ಫಾರ್ ಇಂಟರ್‌ನ್ಯಾಷನಲ್ ಕೋಆಪರೇಶನ್ ಇದಕ್ಕೆ ಸಹಕಾರ ನೀಡುತ್ತಿದೆ.

ಹೊಗೇನಕಲ್ ಎಂಬುದು ಉಭಯ ರಾಜ್ಯಗಳ ನಡುವೆ ಇದ್ದ ಕಾವೇರಿ ವಿವಾದದ ಮತ್ತೊಂದು ಹೊರಳಿಕೆ. ಗಡಿಭಾಗದಲ್ಲಿರುವ ಹೊಗೇನಕಲ್ ಪ್ರದೇಶವು ತಮಿಳುನಾಡಿಗೆ ಸೇರಿದ್ದೋ, ಕರ್ನಾಟಕಕ್ಕೋ ಎಂಬ ಬಗೆಗಿದ್ದ ವಿವಾದವಿನ್ನೂ ಶಮನವಾಗಿಲ್ಲ. ಈ ಹಂತದಲ್ಲಿ ಕರುಣಾನಿಧಿ ಅತ್ಯಂತ ಕಟು ಶಬ್ದಗಳಲ್ಲಿ ಮಾತನಾಡುವ ಮೂಲಕ ಕನ್ನಡಿಗರ ಸ್ವಾಭಿಮಾನವನ್ನು ಕೆಣಕಿದ್ದಾರೆ. ಕರ್ನಾಟಕದ ಮಂದಿ ತಮಿಳುನಾಡು ಬಸ್ಸುಗಳನ್ನು ಮುರೀತಾರಂತೆ, ನಮ್ಮ ಬೆನ್ನೆಲುಬುಗಳನ್ನು ಮುರಿದರೂ ನಾವು ಬೆದರುವುದಿಲ್ಲ, ಯೋಜನೆ ಪೂರ್ಣಗೊಳಿಸಿಯೇ ಸಿದ್ಧ ಎಂದಿದ್ದಾರವರು. ಮೌನವಾಗಿದ್ದುಕೊಂಡೇ ಯೋಜನೆಯ ಮುಂದುವರಿಕೆ ಬಗ್ಗೆ ಗಮನಿಸುತ್ತಿದ್ದ ಕರುಣಾನಿಧಿಯನ್ನು ಬಡಿದೆಬ್ಬಿಸಿರುವುದಕ್ಕೆ, ಮಾಜಿ ಮುಖ್ಯಮಂತ್ರಿ ಜಯಲಲಿತಾ ಅವರ ಟೀಕೆಯೂ ಕಾರಣ. ಸರಕಾರ ಈ ಯೋಜನೆ ಬಗ್ಗೆ ಮೃದು ಧೋರಣೆ ತಳೆಯುತ್ತಿದೆ, ಹೊಗೇನಕಲ್ ತಮಿಳುನಾಡಿಗೆ ಸೇರಿದ್ದು, ಕರ್ನಾಟಕಕ್ಕೆ ಅದರ ಮೇಲೆ ಯಾವುದೇ ಅಧಿಕಾರ ಇಲ್ಲ ಎಂದು ಜಯಾ ಟೀಕಿಸಿದ್ದರು.

ಕಳೆದ ವಾರವಷ್ಟೇ ತಮಿಳುನಾಡು ವಿಧಾನಸಭೆಯಲ್ಲಿ ಈ ಕುರಿತು ಚರ್ಚೆ ನಡೆದು, ಯೋಜನೆ ವಿರುದ್ಧದ ಪ್ರತಿಭಟನೆ ನಿಲ್ಲಿಸುವಂತೆ ಕರ್ನಾಟಕಕ್ಕೆ ಸೂಚಿಸಬೇಕು ಎಂದು ಕೇಂದ್ರ ಸರಕಾರವನ್ನು ಆಗ್ರಹಿಸುವ ನಿರ್ಣಯ ಕೈಗೊಳ್ಳಲಾಗಿತ್ತು. ನಿರ್ಣಯ ಮಂಡಿಸಿದ್ದ ಸ್ಥಳೀಯಾಡಳಿತ ಸಚಿವ ಎಂ.ಕೆ.ಸ್ಟಾಲಿನ್ (ಕರುಣಾನಿಧಿ ಪುತ್ರ) ಅವರು. ಈ ಯೋಜನೆಯಿಂದ ಕರ್ನಾಟಕಕ್ಕೆ ಯಾವುದೇ ಹಾನಿಯಿಲ್ಲ, ಕಾವೇರಿ ನದಿಯ ತಮಿಳುನಾಡಿನಲ್ಲಿ ಹರಿಯುವ ಭಾಗವನ್ನು ಮಾತ್ರವೇ ಯೋಜನೆಗೆ ಬಳಸಿಕೊಳ್ಳಲಾಗುತ್ತದೆ ಎಂದು ಹೇಳಿದ್ದರು.

ಆದರೆ ತಮಿಳುನಾಡು ಮುಖ್ಯ ಕಾರ್ಯದರ್ಶಿ ಎಲ್.ಕೆ.ತ್ರಿಪಾಠಿ ಅವರು ನೀಡಿರುವ ಹೇಳಿಕೆಯು ಕಳವಳಕಾರಿಯಾಗಿದೆ. ಅವರು ನೀಡಿರುವ ಹೇಳಿಕೆ ಪ್ರಕಾರ, ಹೊಗೇನಕಲ್ ಜಲ ವಿತರಣಾ ಯೋಜನೆಗೆ ಕರ್ನಾಟಕವು 1998ರಲ್ಲೇ ಅನುಮತಿ ನೀಡಿತ್ತು. ಅಂದಿನ ಕೇಂದ್ರ ಜಲ ಸಂಪನ್ಮೂಲ ಸಚಿವಾಲಯದ ಕಾರ್ಯದರ್ಶಿ ನೇತೃತ್ವದಲ್ಲಿ 1998ರ ಜೂನ್ 29ರಂದು ನಡೆದ ಸಭೆಯಲ್ಲಿ ಅಂದಿನ ಮುಖ್ಯ ಕಾರ್ಯದರ್ಶಿಯವರು ಕರ್ನಾಟಕವನ್ನು ಪ್ರತಿನಿಧಿಸಿದ್ದರು.

ಇತ್ತೀಚೆಗೆ, ರಾಷ್ಟ್ರಪತಿ ಆಳ್ವಿಕೆಯಡಿ ಇರುವ ಕರ್ನಾಟಕದ, ಹಾಲಿ ಮುಖ್ಯ ಕಾರ್ಯದರ್ಶಿ ಸುಧಾಕರ ರಾವ್ ಅವರು ತಮಿಳುನಾಡು ಮತ್ತು ಕೇಂದ್ರ ಸರಕಾರಕ್ಕೆ ಪತ್ರವೊಂದನ್ನು ಬರೆದು, ವಿವಾದ ಬಗೆಹರಿಯುವವರೆಗೂ ಯೋಜನೆ ಮುಂದುವರಿಸದಂತೆ ಕೋರಿದ್ದರು. ಈ ಬಗ್ಗೆ ಪ್ರತಿಕ್ರಿಯಿಸಿದ ತ್ರಿಪಾಠಿ, ತಮ್ಮ ಕಡೆಯಿಂದ ಯಾವುದೇ ವಿವಾದ ಇಲ್ಲ ಎಂದಿದ್ದರಲ್ಲದೆ, ತಮಿಳುನಾಡು ತಮ್ಮ ಪಾಲಿಗೆ ದೊರೆತ ನೀರನ್ನಷ್ಟೇ ಬಳಸಿಕೊಳ್ಳುತ್ತದೆ ಎಂದಿದ್ದಾರೆ.

ಕರ್ನಾಟಕದಲ್ಲೀಗ ಚುನಾವಣೆಯ ಸಮಯ. ರಾಜಕೀಯ ಪಕ್ಷಗಳಂತೂ ಕನ್ನಡ ಮನಸುಗಳ ಗಮನ ಸೆಳೆಯಲು ಹೊಗೇನಕಲ್ ಘಟನೆಯನ್ನು ಅಸ್ತ್ರವಾಗಿಸಿಕೊಳ್ಳುವ ಎಲ್ಲ ಲಕ್ಷಣಗಳೂ ಕಂಡುಬರುತ್ತಿವೆ. ಏನೇ ಆದರೂ ಕರ್ನಾಟಕದ ಹಿತ ಕಾಯಲು ರಾಜಕೀಯ ಪಕ್ಷಗಳಿಗೆ ಇದೊಂದು ಅವಕಾಶ.

ಕಪ್ಪು ಕನ್ನಡಕದ ತಮಿಳು ಮುಖ್ಯಮಂತ್ರಿ ಹೇಳಿಕೆಯು ಸಹಜವಾಗಿ ಕನ್ನಡ ಪರ ಸಂಘಟನೆಗಳು ಮತ್ತು ಪಕ್ಷ ಭೇದವಿಲ್ಲದೆ ರಾಜ್ಯದ ರಾಜಕೀಯ ಪಕ್ಷಗಳನ್ನೂ ಬಡಿದೆಬ್ಬಿಸಿವೆ. ಆದರೆ ನಮ್ಮ ಸಂಸದರು ಮಾತ್ರ ಎಚ್ಚೆತ್ತುಕೊಳ್ಳಲು ಸಾಕಷ್ಟು ಕಾಲಾವಕಾಶ ಬೇಕೇನೋ...!

ಯೋಜನೆ ಬಗ್ಗೆ ಒಂದಿಷ್ಟು:
1334 ಕೋಟಿ ರೂ.ಗಳ ಜಪಾನ್ ಸಹಯೋಗದ ಹೊಗೇನಕಲ್ ಯೋಜನೆಯು, ತಮಿಳುನಾಡಿನ ಕೃಷ್ಣಗಿರಿ ಮತ್ತು ಧರ್ಮಪುರಿ ಜಿಲ್ಲೆಗಳ ಬಂಜರುಪ್ರದೇಶದ 40.4 ಲಕ್ಷ ಜನರಿಗೆ ದಿನವೊಂದಕ್ಕೆ 160 ದಶಲಕ್ಷ ಲೀಟರ್ ವೀರು ವಿತರಿಸುವ ಉದ್ದೇಶ ಹೊಂದಿದೆ. ಜಪಾನ್ ಬ್ಯಾಂಕ್ ಫಾರ್ ಇಂಟರ್‌ನ್ಯಾಷನಲ್ ಕೋಆಪರೇಶನ್ ಇದಕ್ಕೆ ಸಹಕಾರ ನೀಡುತ್ತಿದೆ. ಫೆಬ್ರವರಿ 26ರಂದು ಕರುಣಾನಿಧಿ ಅವರು ಈ ಯೋಜನೆಗೆ ಶಂಕುಸ್ಥಾಪನೆ ನೆರವೇರಿಸಿದ್ದರು. ಮಾರ್ಚ್ 16ರಂದು ಮಾಜಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರು ಯೋಜನಾ ಪ್ರದೇಶಕ್ಕೆ ತೆರಳಿ ಅಲ್ಲಿ ಬಿಜೆಪಿ ವತಿಯಿಂದ ತಮಿಳುನಾಡು ಯೋಜನೆ ವಿರುದ್ಧ ಪ್ರತಿಭಟನೆ ಆಯೋಜಿಸಿದ್ದರು. ಮಾರ್ಚ್ 27ರಂದು ತಮಿಳುನಾಡು ವಿಧಾನಸಭೆಯು ನಿರ್ಣಯವೊಂದನ್ನು ಕೈಗೊಂಡು, ಯೋಜನೆಯ ಅನುಷ್ಠಾನಕ್ಕೆ ಕೇಂದ್ರದ ಸಂಪೂರ್ಣ ಸಹಕಾರ ಕೋರಿತ್ತಲ್ಲದೆ, ಕರ್ನಾಟಕಕ್ಕೆ ತಿಳಿಹೇಳುವಂತೆಯೂ ಕೇಳಿಕೊಂಡಿತ್ತು.

ಕನ್ನಡಿಗರ ಕುರಿತು ಕೆಟ್ಟ ಪದ ಬಳಸಿಲ್ಲ: ಕರುಣಾನಿಧಿ ಸ್ಪಷ್ಪನೆ

2008-04-04T09:04:00.000-07:00

ಚೆನ್ನೈ: ಹಿರಿಯ ಕಾಂಗ್ರೆಸ್ ಮುಖಂಡ ಎಸ್.ಎಂ.ಕೃಷ್ಣ ಅವರು ಆರೋಪಿಸಿರುವಂತೆ ಕರ್ನಾಟಕದ ಜನತೆಯ ವಿರುದ್ಧ ತಾನು ಯಾವುದೇ ಕೆಟ್ಟ ಪದಗಳನ್ನು ಬಳಸಿಲ್ಲ ಎಂದು ತಮಿಳುನಾಡು ಮುಖ್ಯಮಂತ್ರಿ ಎಂ.ಕರುನಾನಿಧಿ ಗುರುವಾರ ಹೇಳಿದ್ದಾರೆ.

ಈ ಕುರಿತು ಪ್ರಧಾನಮಂತ್ರಿ ಮನಮೋಹನ್ ಸಿಂಗ್ ಮತ್ತು ಯುಪಿ‌ಎ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರಿಗೆ ಕರುಣಾನಿಧಿ ಅವರು ಪತ್ರವೊಂದನ್ನು ಬರೆದಿದ್ದು, ಅದರಲ್ಲಿ ಹೊಗೇನಕಲ್ ವಿವಾದಕ್ಕೆ ಸಂಬಂಧಿಸಿದಂತೆ ಎಪ್ರಿಲ್ ೧ರಂದು ಸಾರ್ವಜನಿಕವಾಗಿ ಅಥವಾ ವಿಧಾನಸಭೆಯಲ್ಲಿ ಹೊರಡಿಸಿದ ನಿರ್ಣಯ ಗೊತ್ತುವಳಿಯಲ್ಲಿ ಕರ್ನಾಟಕದ ಕುರಿತು ಯಾವುದೇ ತೀಕ್ಷ್ಣ ಹೇಳಿಕೆ ನೀಡಿರುವುದನ್ನು ಅವರು ನಿರಾಕರಿಸಿದ್ದಾರೆ. ಈ ಪತ್ರ ಮಾಧ್ಯಮದವರಿಗೆ ಲಭ್ಯವಾಗಿದೆ.

ತಮಿಳುನಾಡು ಮುಖ್ಯಮಂತ್ರಿ ಕರುಣಾನಿಧಿ ಅವರು ಕನ್ನಡಿಗರ ಕುರಿತು ನಿಂದನಾತ್ಮಕ ಪದಗಳನ್ನು ಬಳಕೆ ಮಾಡಿ ಹೇಳಿಕೆ ನೀಡಿರುವುದು ಆರೋಗ್ಯಕರ ಬೆಳವಣಿಗೆಯಲ್ಲ ಎಂದು ಕಳೆದ ಬುಧವಾರ ನವದೆಹಲಿಯಲ್ಲಿ ಎಸ್.ಎಂ.ಕೃಷ್ಣ ಅವರು ನೀಡಿರುವ ಹೇಳಿಕೆಗೆ ಕರುಣಾನಿಧಿ ಅವರು ಪ್ರತಿಕ್ರಿಯಿಸಿದ್ದಾರೆ.

ನೆರೆಯ ರಾಜ್ಯದಲ್ಲಿ ತಮಿಳುನಾಡಿನ ಬಸ್ಸುಗಳನ್ನು ದಹಿಸುವುದು, ತಮಿಳು ಚಿತ್ರಗಳನ್ನು ನಿಬಂರ್ಧಿಸುವುದು, ಬೆಂಗಳೂರಿನಲ್ಲಿರುವ ತಮಿಳು ಸಂಗಮ್ ಕಚೇರಿಯ ಮೇಲೆ ದಾಳಿ ನಡೆಸುವುದು ಮತ್ತು ಅಲ್ಲಿನ ತಮಿಳರಲ್ಲಿ ಭೀತಿ ಸೃಷ್ಟಿಸುವುದನ್ನು ಕಂಡು ಒಂದು ರಾಜ್ಯದ ಮುಖ್ಯಮಂತ್ರಿಯಾಗಿ ನಾನು ಸುಮ್ಮನೆ ಕೂಡಲು ಸಾಧ್ಯವಿಲ್ಲ ಎಂದು ಅವರು ಪತ್ರದಲ್ಲಿ ಹೇಳಿದ್ದಾರೆ.

ಹೊಗೇನಕಲ್: ಲೋಕಸಭೆಯಲ್ಲಿ ವಾಗ್ವಾದ

2008-04-04T08:59:00.000-07:00

ಹೊಗೇನಕಲ್‌ನ ವಿವಾದಾತ್ಮಕ ಜಲವಿದ್ಯುತ್ ಹಾಗೂ ಕುಡಿಯುವ ನೀರಿನ ಯೋಜನೆ ಸೋಮವಾರ ಲೋಕಸಭೆಯಲ್ಲಿ ಕರ್ನಾಟಕ ಮತ್ತು ತಮಿಳುನಾಡು ಸದಸ್ಯರ ನಡುವೆ ಮಾತಿನ ಚಕಮಕಿಗೆ ಕಾರಣವಾಯಿತು.

ನವದೆಹಲಿ: ಶೂನ್ಯವೇಳೆಯ್ಲಲಿ ಈ ವಿಷಯವನ್ನು ಪ್ರಸ್ತಾಪಿಸಿದ ಬಿಜೆಪಿ ಸದಸ್ಯ ಅನಂತಕುಮಾರ್ ಕರ್ನಾಟಕ ವಿರೋಧಿಸುತ್ತಲೇ ಬಂದಿರುವ ಹೊಗೇನಕಲ್ ಯೋಜನೆಯ ಕಾಮಗಾರಿಯನ್ನು ಕೇಂದ್ರ ಜಲ ಆಯೋಗದ ಅನುಮತಿ ಇಲ್ಲದೆ ಮುಂದುವರಿಸಲು ಅವಕಾಶ ನೀಡದಿರಲು ಒತ್ತಾಯಿಸಿದರು.

ಅವರ ಆಗ್ರಹಕ್ಕೆ ದನಿಗೂಡಿಸಿದವರು- ಬಿಜೆಪಿಯ ಇತರ ಸದಸ್ಯರಾದ ಪ್ರಹ್ಲಾದ ಜೋಷಿ, ಮಂಜುನಾಥ ಕುನ್ನೂರು, ಕರುಣಾಕರ ರೆಡ್ಡಿ, ಪಿ.ಸಿ.ಗ್ದದಿಗೌಡರ್ ಮತ್ತು ಜಿ.ಎಂ.ಸ್ದಿದೇಶ್ವರ.

ಹಠಾತ್ತನೇ ಪ್ರಸ್ತಾಪಗೊಂಡ ವಿವಾದದಿಂದ ವಿಚಲಿತರಾದಂತೆ ಕಂಡಬಂದ ಡಿ‌ಎಂಕೆ ಸದಸ್ಯರು ಸಚಿವ ಎ.ರಾಜಾ ನೇತೃತ್ವದ್ಲಲಿ ಪ್ರತಿಭಟನೆ ನಡೆಸಿದರು. ಇದು ರಾಜ್ಯಕ್ಕೆ ಸೇರಿದ ಯೋಜನೆಯಾಗ್ದಿದು ಇದರ ಮೇಲೆ ಚರ್ಚೆಗೆ ಇಲಿ ಅವಕಾಶ ನೀಡಬಾರದು ಎಂದು ಅವರು ಹಠ ಹಿಡಿದರೂ ಲೋಕಸಭಾ ಉಪಾಧ್ಯಕ್ಷರು ಕಿವಿಗೊಡದೆ ಅನಂತಕುಮಾರ್ ಮಾತು ಮುಂದುವರಿಸಲು ಅವಕಾಶ ನೀಡಿದರು.

ಹೊಗೇನಕಲ್ ನಮ್ಮ ರಾಜ್ಯದ ಅವಿಭಾಜ್ಯ ಅಂಗವೆಂದು ತಮಿಳುನಾಡು ಸರ್ಕಾರಕ್ಕೆ ಕರ್ನಾಟಕ ತಿಳಿಸುತ್ತಲೇ ಬಂದಿದೆ. ಕಾನೂನು ತಜ್ಞರ ಅಭಿಪ್ರಾಯ ಮತ್ತು ಹಳೆಯ ಮದ್ರಾಸ್ ಸರ್ಕಾರದ ಸ್ಥಳನಕಾಶೆಗಳು ಕೂಡಾ ನಮ್ಮ ವಾದವನ್ನು ಪುಷ್ಠೀಕರಿಸಿವೆ.

ಇದರ ಹೊರತಾಗಿಯೂ ಮುಖ್ಯಮಂತ್ರಿ ಕರುಣಾನಿಧಿ ಅವರು ಅಲ್ಲಿಗೆ ತೆರಳಿ ಯೋಜನೆಗೆ ಶಂಕುಸ್ಥಾಪನೆ ಮಾಡಿ ವಿವಾದ ಸೃಷ್ಟಿಸ್ದಿದಾರೆ ಎಂದು ಅವರು ಟೀಕಿಸಿದರು. ಕಾವೇರಿ ನದಿನೀರು ಹಂಚಿಕೆಗೆ ಸಂಬಂಧಿಸಿದ ವಿವಾದಗಳನ್ನು ಇತ್ಯರ್ಥಗೊಳಿಸಲು ರಚನೆಗೊಂಡ ನ್ಯಾಯಮಂಡಳಿ ಮುಂದೆ ತಮಿಳುನಾಡು ಎಂದೂ ಈ ಯೋಜನೆಯ ಬಗ್ಗೆ ಪ್ರಸ್ತಾಪಿಸಿರಲ್ಲಿಲ. ಕಾವೇರಿ ನ್ಯಾಯಮಂಡಳಿಯ ಅಂತಿಮ ಐತೀರ್ಪನ್ನು ಪ್ರಶ್ನಿಸಿರುವ ಅರ್ಜಿ ಸುಪ್ರೀಂಕೋರ್ಟ್‌ನ್ಲಲಿ ವಿಚಾರಣೆಯ್ಲಲಿದೆ ಎಂದರು.
ಆದರಿಂದ ಈಹಂತದ್ಲಲಿ ಯೋಜನೆಯ ಕಾಮಗಾರಿ ಪ್ರಾರಂಭಿಸಿರುವುದು ವಿಚಾರಣಾಧೀನ ಆಗಲಿದೆ ಎಂದು ಅನಂತಕುಮಾರ್ ವಾದಿಸಿದರು.

ಕೇಂದ್ರ ಜಲ ಆಯೋಗ ಮತ್ತು ಕೇಂದ್ರ ಜಲಸಂಪನ್ಮೂಲ ಇಲಾಖೆಯ ಅಧಿಕಾರಿಗಳು ಖುದ್ದಾಗಿ ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿ ಅಕ್ರಮ ಯೋಜನೆಯನ್ನು ತಡೆಯಬೇಕು. ತಮಿಳುನಾಡಿಗೆ ಹೊಗೇನಕಲ್ ಜಮೀನು ಇಲವೇ ನೀರಿನ ಮೇಲೆ ಯಾವ ಹಕ್ಕು ಕೂಡಾ ಇಲ್ಲ. ನ್ಯಾಯಮಂಡಳಿಯನ್ನು ತಪ್ಪುದಾರಿಗೆಳೆದಿರುವ ತಮಿಳುನಾಡು ಈಗ ಅಕ್ರಮವಾಗಿ ಯೋಜನೆಯನ್ನು ಮುಂದುವರಿಸಿದೆ ಎಂದು ಅವರು ಹೇಳಿದರು.

ಹೊಗೇನಕಲ್: ವಿವಾದಕ್ಕೆ ಕಲಾವಿದರ ಬಲಿಪಶು ಬೇಡ

2008-04-04T08:53:00.000-07:00

ತಮಿಳುನಾಡು ಮತ್ತು ಕರ್ನಾಟಕ ನಡುವಿನ ಹೊಗೇನಕಲ್ ಯೋಜನೆ ವಿವಾದ ದಿನಹೋದಂತೆ ಜಟಿಲಗೊಳ್ಳುತ್ತಾ ಸಾಗುತ್ತಿದೆ. ಯೋಜನೆಯ ವಿರುದ್ಧ ಕರ್ನಾಟಕ ರಕ್ಷಣಾ ವೇದಿಕೆ ಕಾರ್ಯಕರ್ತರು ಇಂದು ಕೂಡ ರಾಜ್ಯಾದ್ಯಂತ ಪ್ರತಿಭಟನೆ ಮುಂದುವರೆಸಿದ್ದಾರೆ.

ಇಂದು(ಗುರುವಾರ) ಗುಲ್ಬರ್ಗಾದಲ್ಲಿ ಕರವೇ ಕಾರ್ಯಕರ್ತರು ತಮಿಳುನಾಡಿನ ಐದು ಬಸ್‌ಗಳಿಗೆ ಬೆಂಕಿ ಹಚ್ಚಿ ಪ್ರತಿಭಟನೆ ನಡೆಸಿದ್ದು, ತಮಿಳುನಾಡು ವಿರುದ್ಧ ಘೋಷಣೆಗಳನ್ನು ಕೂಗಿ, ಕರುಣಾನಿಧಿಯವರ ಪ್ರತಿಕೃತಿಗಳನ್ನು ದಹಿಸಿ ಪ್ರತಿಭಟನೆ ನಡೆಸಿದರು. ಈಗಾಗಲೇ ಏಪ್ರಿಲ್ 10ರಂದು ನಿಗದಿಯಾಗಿರುವ ಕರ್ನಾಟಕ ಬಂದ್‌ಗೆ 300ಕ್ಕೂ ಹೆಚ್ಚು ಕನ್ನಡ ಪರ ಸಂಘಟನೆಗಳು ಬೆಂಬಲ ಸೂಚಿಸಿವೆ.

ಈ ನಡುವೆ ಕನ್ನಡ ಚಿತ್ರರಂಗ ಕೂಡ ಈ ಬಗ್ಗೆ ಹೇಳಿಕೆ ನೀಡಿದ್ದು, ರಾಷ್ಟ್ತ್ರಮಟ್ಟದಲ್ಲಿ ಸಮಸ್ಯೆ ಇತ್ಯರ್ಥವಾಗಬೇಕೆಂದು ತಿಳಿಸಿದೆ. ಈ ಬಗ್ಗೆ ಹೇಳಿಕೆ ನೀಡಿರುವ ಚಿತ್ರನಟ ವಿಷ್ಣುವರ್ಧನ್ ಹಾಗೂ ಅಂಬರಿಷ್ ಅವರು, ವಿವಾದಕ್ಕೆ ಕಲಾವಿದರನ್ನು ಎಳೆದು ತರುವುದು ಸರಿಯಲ್ಲ. ಕಲಾವಿದರು ಯಾವಾಗಲೂ ರಾಜ್ಯದ ಪರವೇ ನಿಲುವು ಹೊಂದಿರುತ್ತಾರೆ ಎಂದು ತಿಳಿಸಿದ್ದಾರೆ.

ಈ ಮಧ್ಯೆ ದಕ್ಷಿಣ ಕನ್ನಡದಲ್ಲಿಯೂ ಪ್ರತಿಭಟನೆಯ ಬಿಸಿ ತಟ್ಟಿದ್ದು, ಉಡುಪಿಯಲ್ಲಿ ಕರವೇ ಕಾರ್ಯಕರ್ತರು ತಮಿಳುನಡು ಸರ್ಕಾರದ ವಿರುದ್ಧ ಘೋಷಣೆಯನ್ನು ಕೂಗಿ ಪ್ರತಿಭಟನೆ ನಡೆಸಿದರು.

ಬಂದ್‌ಗೆ ಕನ್ನಡ ಚಿತ್ರೋದ್ಯಮದ ಪೂರ್ಣಬೆಂ'ಬಲ'

2008-04-04T05:18:00.000-07:00

ಬೆಂಗಳೂರು, ಏ.2: ತಮಿಳುನಾಡಿನ ವಿವಾದಾತ್ಮಕ ಹೊಗೇನಕಲ್ ಜಲ ವಿವಾದವನ್ನು ವಿರೋಧಿಸಿ ಏ.10ರಂದು ಕರೆ ಕೊಟ್ಟಿರುವ ರಾಜ್ಯ ಬಂದ್‌ಗೆ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಸಂಪೂರ್ಣ ಬೆಂಬಲ ನೀಡಲಿದೆ ಎಂದು ಅಖಿಲ ಕರ್ನಾಟಕ ಡಾ.ರಾಜ್‌ಕುಮಾರ್ ಅಭಿಮಾನಿಗಳ ಸಂಘದ ಅಧ್ಯಕ್ಷ ಸಾ.ರಾ.ಗೋವಿಂದು ಬುಧವಾರ ತಿಳಿಸಿದರು.

ಏಪ್ರಿಲ್ 10ರಂದು ಎಲ್ಲಾ ಚಲನಚಿತ್ರಗಳ ಪ್ರದರ್ಶನವನ್ನು ರದ್ದು ಮಾಡಲಾಗುತ್ತದೆ. ಚಿತ್ರೀಕರಣವನ್ನೂ ‍ಸ್ಥಗಿತಗೊಳಿಸಿ ಬಂದ್‌ ಆಚರಿಸಲಾಗುವುದು. ಅಖಿಲ ಕರ್ನಾಟಕ ಡಾ.ರಾಜ್‌ಕುಮಾರ್ ಅಭಿಮಾನಿಗಳ ಸಂಘವೂ ಸಹ ರಾಜ್ಯ ಬಂದ್‌ಗೆ ಬೆಂಬಲ ವ್ಯಕ್ತಪಡಿಸಿದೆ. ಡಾ.ರಾಜ್ ಅಭಿಮಾನಿಗಳ ಸಂಘವಾಗಲೀ, ಚಲನಚಿತ್ರ ವಾಣಿಜ್ಯ ಮಂಡಳಿಯಾಗಲೀ ಹೋರಾಟಕ್ಕೆ ಹಿಂದೆ ಮುಂದೆ ನೋಡುವುದಿಲ್ಲ ಎಂದು ಸಾ.ರಾ.ಗೋವಿಂದು ತಿಳಿಸಿದರು.

ದಕ್ಷಿಣ ಭಾರತ ಚಲನಚಿತ್ರ ವಾಣಿಜ್ಯ ಮಂಡಳಿಯಿಂದ ಸಾ.ರಾ.ಗೋವಿಂದು ಸೇರಿದಂತೆ ನಾಲ್ಕು ಮಂದಿ ಕನ್ನಡಿಗರನ್ನು ಅಮಾನತು ಮಾಡಿದೆ. ಈ ರೀತಿಯ ಗೊಡ್ಡು ಬೆದರಿಕೆಗಳಿಗೆ ಎದೆಗುಂದುವುದಿಲ್ಲ ಎಂದು ಸಾ.ರಾ.ಗೋವಿಂದು ಪ್ರತಿಕ್ರಿಯಿಸಿದರು.

ಬಂದ್‌ಗೆ 300ಕ್ಕೂ ಅಧಿಕ ವಿವಿಧ ಕನ್ನಡ ಪರ ಸಂಘಟನೆಗಳು ಬೆಂಬಲ ಸೂಚಿಸಿವೆ.ಗಡಿ ಹೋರಾಟ ಸಮಿತಿ ಅಧ್ಯಕ್ಷ ವಾಟಾಳ್ ನಾಗರಾಜ್, ಕನ್ನಡಸೇನೆ ರಾಜ್ಯಾಧ್ಯಕ್ಷ ಕುಮಾರ್, ದಲಿತ ಸಂಘರ್ಷ ಸಮಿತಿ ಅಧ್ಯಕ್ಷ ಎನ್.ಮೂರ್ತಿ ಬಂದ್‌ಗೆ ಸಂಪೂರ್ಣ ಬೆಂಬಲ ನೀಡಿರುವುದಾಗಿ ತಿಳಿಸಿದ್ದಾರೆ.

ತಮಿಳರ ಪ್ರತಿಭಟನೆಗೆ ರಜನಿ, ಕಮಲ್ ಸೇರ್ಪಡೆ

2008-04-04T05:15:00.000-07:00

ತಮಿಳುನಾಡು ಸರಕಾರದ ಹೊಗೇನಕಲ್ ಕುಡಿಯುವ ನೀರಿನ ಯೋಜನೆ ವಿರುದ್ಧ ಕರ್ನಾಟಕ ತಳೆದಿರುವ ನಿಲುವುಗಳ ವಿರುದ್ಧ ತಮಿಳು ಚಿತ್ರರಂಗದ ನಾನಾ ಘಟಕಗಳು ನಾಳೆ (ಏ. 4) ಗುರುವಾರ ಇಲ್ಲಿ ಹಮ್ಮಿಕೊಂಡಿರುವ ಉಪವಾಸ ಸತ್ಯಾಗ್ರಹದಲ್ಲಿ ಸೂಪರ್ ಸ್ಟಾರ್ ರಜನಿಕಾಂತ್ ಭಾಗವಹಿಸುತ್ತಿದ್ದಾರೆ.

ಚಿತ್ರರಂಗದ ಸತ್ಯಾಗ್ರಹ ಸುತ್ತೋಲೆಯನ್ನು ಗಮನಿಸಿದ ತತ್ ಕ್ಷಣ ರಜನಿ ಹೈದರಾಬಾದಿನಲ್ಲಿ ತಡೆಯುತ್ತಿರುವ "ಕುಸೇಲನ್" ಚಿತ್ರೀಕರಣವನ್ನು ನಿಲ್ಲಿಸಿ ತಂಡದ ಸಮೇತ ಚೆನ್ನೈಗೆ ಆಗಮಿಸಿದರು. ಪ್ರತಿಭಟನೆ ವ್ಯವಸ್ಥೆ ಮಾಡಿರುವ ಮುಂದಾಳುಗಳನ್ನು ಫೋನ್ ಮೂಲಕ ಸಂಪರ್ಕಿಸಿ ತಾವು ಸತ್ಯಾಗ್ರಹ ಸ್ಥಳಕ್ಕೆ ಬರುತ್ತಿರುವುದಾಗಿ ಹೇಳಿದರು.

ನಡಿಗರ ಸಂಘಂನ ಕಾರ್ಯದರ್ಶಿ ರಾಧಾ ರವಿ ಪ್ರಕಾರ ರಜನಿ ಫೋನ್ ಮೂಲಕ ಸತ್ಯಾಗ್ರಹದ ವ್ಯವಸ್ಥೆಗಳ ಬಗೆಗೆ ವಿಚಾರಿಸಿದರಲ್ಲದೆ, ತಾವು ಎಷ್ಟು ಹೊತ್ತಿಗೆ ಎಲ್ಲಿಗೆ ಬರಬೇಕು ಎಂದು ಕೇಳಿಕೊಂಡರು.(ಎತ್ತಣಿ ಮಣಿಕ್ಕು ವರಣಮ್ ನು ಸೊಲ್ಲಪ್ಪ, ಶಾರ್ಪ್ ವಂದುರರೇನ್).

ಇನ್ನೊಬ್ಬ ಸೂಪರ್ ಸ್ಟಾರ್ ಕಮಲ್ ಹಾಸನ್ ತಮ್ಮ ಎಲ್ಲ ಕೆಲಸ ಕಾರ್ಯಗಳನ್ನು ಬದಿಗೊತ್ತಿ ಪ್ರತಿಭಟನೆಯಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಇನ್ನೂ ಸೆಟ್ಟೇರಲಿರುವ ಅವರ "ಮರ್ಮಯೋಗಿ" ಚಿತ್ರಿಕರಣದ ಏರ್ಪಾಡುಗಳನ್ನು ಅವರು ಅವೆರಿಕಾದಲ್ಲಿ ಮಾಡುತ್ತಿದ್ದಾರೆ. ಅಮೆರಿಕಾದಿಂದ ದಡಬಡನೆ ಅವರು ಹಾರಿಬರಲಿದ್ದು ಪ್ರತಿಭಟನಾ ಸ್ಥಳಕ್ಕೆ ಗುರುವಾರ ಮಧ್ಯಾನ್ಹ ತಲುಪುವರು.

ತಮಿಳು ಚಿತ್ರರಂಗದ ಸುಮಾರು 10,000 ಮಂದಿ ಉಪವಾಸ ಸತ್ಯಾಗ್ರಹದಲ್ಲಿ ಪಾಲ್ಗೊಳ್ಳುವರೆಂದು ನಿರೀಕ್ಷಿಸಲಾಗಿದೆ. ಉಪವಾಸ ಸತ್ಯಾಗ್ರಹಕ್ಕೆ ಚಿಪಾಕ್ ಗೆಸ್ಟ್ ಹೌಸ್ ಬಳಿ ಸ್ಥಳ ನಿಗದಿ ಮಾಡಲಾಗಿದೆ ಎಂದು ಚೆನ್ನೈ ಪೊಲೀಸ್ ಕಮಿಷನರ್ ನಾಂಜಿಲ್ ಕುಮರನ್ ದಟ್ಸ್ ಕನ್ನಡಕ್ಕೆ ಬುಧವಾರ ಮಧ್ಯಾನ್ಹ ತಿಳಿಸಿದರು.

ಹೊಗೆ: ತಮಿಳು ಚಿತ್ರರಂಗದಿಂದಲೂ ಉಪವಾಸ

2008-04-04T05:14:00.000-07:00

ಹೊಗೇನಕಲ್ ನೀರಿನ ವಿವಾದಕ್ಕೆ ಸಂಬಂಧಿಸಿ ಕರ್ನಾಟಕದಲ್ಲಿ ತಮಿಳು ಜನರ ಮೇಲಿನ ದಾಳಿ ಹಾಗೂ ತಮಿಳು ಚಿತ್ರಗಳ ನಿಷೇಧ ವಿರೋಧಿಸಿ ತಮಿಳು ಚಿತ್ರ ನಿರ್ಮಾಪಕರ ಸಂಘವು ಚೆನ್ನೈಯಲ್ಲಿ ಶುಕ್ರವಾರ ಪ್ರತಿಭಟನಾ ಸಭೆ ನಡೆಸುತ್ತಿದ್ದು, ರಜನೀಕಾಂತ್ ಸಹಿತ ಕನ್ನಡ ಮೂಲದ ಚಿತ್ರ ನಟರು ಕೂಡ ಭಾಗವಹಿಸುತ್ತಿದ್ದಾರೆ.

ಈ ಉಪವಾಸ ಸತ್ಯಾಗ್ರಹದಲ್ಲಿ ಭಾಗವಹಿಸುವಂತೆ ತಮಿಳು ಚಿತ್ರ ನಿರ್ಮಾಪಕರ ಸಂಘವು ನಟ ರಜನೀಕಾಂತ್ ಅವರಿಗೆ ಎಚ್ಚರಿಕೆ ಸಹಿತದ ಸಂದೇಶವೊಂದನ್ನು ನೀಡಿತ್ತು. 2002ರ ಕಾವೇರಿ ಜಲ ವಿವಾದದ ಸಂದರ್ಭದಲ್ಲಿ ನಡೆದಿದ್ದ ತಮಿಳು ಚಿತ್ರರಂಗದ ಉಪವಾಸ ಸತ್ಯಾಗ್ರಹದಲ್ಲಿ ಭಾಗವಹಿಸದಿದ್ದ ರಜನೀಕಾಂತ್, ತಮಿಳು ಚಿತ್ರೋದ್ಯಮದ ಟೀಕೆಗೆ ಗುರಿಯಾಗಿದ್ದರು. ನಡಿಗರ್ ಸಂಘಂ (ಚಿತ್ರ ಕಲಾವಿದರ ಒಕ್ಕೂಟ) ಅಧ್ಯಕ್ಷ ಶರತ್ ಕುಮಾರ್ ಅವರು, ಈ ಉಪವಾಸ ಸತ್ಯಾಗ್ರಹದಲ್ಲಿ ತಮಿಳು ಚಿತ್ರೋದ್ಯಮದ ಎಲ್ಲಾ ನಟರು, ತಂತ್ರಜ್ಞರು, ಇತರ ಕಲಾವಿದರು ಭಾಗವಹಿಸುವಂತೆ ಕರೆ ನೀಡಿದ್ದರು.

'ಹುಟ್ಟಿನಿಂದ ಅಥವಾ ಮಾತೃಭಾಷೆಯಿಂದ ಕರ್ನಾಟಕದವರಾಗಿರುವ ಕಲಾವಿದರು, ನಿರ್ಮಾಪಕರು, ನಿರ್ದೇಶಕರು ಕೂಡ ಈ ಉಪವಾಸ ಸತ್ಯಾಗ್ರಹದಲ್ಲಿ ಪಾಲ್ಗೊಳ್ಳಬೇಕು' 'ಫರ್ಮಾನು' ಹೊರಡಿಸಿದ್ದ ಶರತ್ ಕುಮಾರ್, ಭಾಗವಹಿಸಲು ವಿಫಲರಾದವರು ತಮಿಳು ಚಿತ್ರೋದ್ಯಮದಿಂದ 'ಅಸಹಕಾರ' ಎದುರಿಸಬೇಕಾದೀತು ಎಂಬ ಎಚ್ಚರಿಕೆಯನ್ನೂ ಜೊತೆಗೇ ಸೇರಿಸಿದ್ದರು.

ಚೆನ್ನೈಯಲ್ಲಿ ನಡೆಯುತ್ತಿರುವ ತಮಿಳು ಚಿತ್ರರಂಗದ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದ ಚಿತ್ರೋದ್ಯಮದ ಮಂದಿಯಲ್ಲಿ ಕೆಲವರು ಮೈಕಿನ ಮುಂದೆ ಬಂದು, ಹೊಗೇನಕಲ್ ನಮಗೆ ಸೇರಿದ್ದು, ಬೆಂಗಳೂರು ನಮಗೆ ನೀರು ಕೊಡುತ್ತಿಲ್ಲ ಎಂಬುದೇ ಮುಂತಾಗಿ, ಪ್ರತಿಭಟನೆಯ ಮೂಲ ಉದ್ದೇಶವನ್ನು ಮರೆತು ಅಲವತ್ತುಕೊಳ್ಳುತ್ತಿದ್ದುದು ಕಂಡು ಬಂತು.

ಇನ್ನು ಕೆಲವರು ಮಾತ್ರ, ಬೆಂಗಳೂರಿನಲ್ಲಿ ತಮಿಳು ಚಿತ್ರಗಳನ್ನು ತಡೆಯೊಡ್ಡಿದ, ಪ್ರದರ್ಶನಕ್ಕೆ ತಡೆಯೊಡ್ಡಿ ದಾಂಧಲೆ ನಡೆಸಿದ ಪ್ರಕರಣದ ವಿರುದ್ಧ ಧ್ವನಿಯೆತ್ತಿದರು.

ಹೊಗೇನಕಲ್ : ಕನ್ನಡ ಚಿತ್ರರಂಗದ ಪ್ರತಿಭಟನೆ

2008-04-04T05:06:00.000-07:00

ಹೊಗೇನಕಲ್ ಹೊಗೆಯ ಜ್ವಾಲೆ ರಾಜ್ಯಾದ್ಯಂತ ಹೊತ್ತಿಕೊಂಡಿದ್ದು, ತೀವ್ರ ಸ್ವರೂಪವನ್ನು ಪಡೆದುಕೊಂಡಿದೆ. ಇಂದು(ಶುಕ್ರವಾರ) ಪುರಭವನದಲ್ಲಿ ಕನ್ನಡ ಚಿತ್ರರಂಗವು ಪ್ರತಿಭಟನೆಯನ್ನು ಪ್ರಾರಂಭಿಸಿದೆ.

ಬೆಳಿಗ್ಗೆ 10.30 ಪ್ರಾರಂಭವಾದ ಪ್ರತಿಭಟನೆಯಲ್ಲಿ ಕನ್ನಡ ಚಿತ್ರರಂಗದ ಬಹುತೇಕ ಎಲ್ಲಾ ಕಲಾವಿದರು ಧರಣಿಯಲ್ಲಿ ಭಾಗವಹಿಸಿದ್ದಾರೆ. ಸಾ.ರಾ. ಗೋವಿಂದ ನೇತೃತ್ವದಲ್ಲಿ ನಡೆಯುತ್ತಿರುವ ಶಾಂತಿ ಪ್ರತಿಭಟನೆಯಲ್ಲಿ ಪಾರ್ವತಮ್ಮ ರಾಜ್‌ಕುಮಾರ್, ರವಿಚಂದ್ರನ್, ಪ್ರೇಮ್, ಅನುಪ್ರಭಾಕರ್, ಜಗ್ಗೆಶ್, ದರ್ಶನ್, ರಮ್ಯ, ಶ್ರೀನಾಥ್ ಸೇರಿದಂತೆ ಅನೇಕ ಕಲಾವಿದರು ಭಾಗವಹಿಸಿದ್ದಾರೆ.

ಪ್ರತಿಭಟನೆಯಲ್ಲಿ ನಟ ಸುದೀಪ್ ಹಾಗೂ ವಿಷ್ಣುವರ್ಧನ್ ಅವರ ಅನುಪಸ್ಥಿತಿ ಕಂಡು ಬಂದಿದ್ದರೂ, ಅನಿವಾರ್ಯ ಕಾರಣಗಳಿಂದ ಪ್ರತಿಭಟನೆಯಲ್ಲಿ ಭಾಗವಹಿಸುತ್ತಿಲ್ಲ ಎಂದು ತಿಳಿದು ಬಂದಿದೆ. ಇದೇ ಸಂದರ್ಭದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಬಹುತೇಕ ಕಲಾವಿದರು ರಾಜ್ಯಕ್ಕಾಗಿ ಒಗ್ಗಟ್ಟಾಗಿ ಶ್ರಮಿಸುತ್ತೇವೆ ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ.

ಇದೇ ಸಂದರ್ಭದಲ್ಲಿ ಮಾತನಾಡಿದ ನಟ ಜಗ್ಗೇಶ್, ಹೊಗೇನಕಲ್ ಯೋಜನೆಗೆ ಪರಿಹಾರವನ್ನು ಕಂಡುಕೊಳ್ಳಲು ಕೇಂದ್ರ ಸರ್ಕಾರ ಮಧ್ಯ ಪ್ರವೇಶಿಸಬೇಕೆಂದು ಒತ್ತಾಯಿಸಿದರು. ಕಲಾವಿದರ ಆಗಮನದಿಂದ ಪರಿಸ್ಥಿತಿ ಕೈ ಮೀರಿ ಹೋಗದಂತೆ ತಡೆಯಲು ಪೊಲೀಸ್ ಇಲಾಖೆ ಸುತ್ತಮುತ್ತಲಿನ ಪ್ರದೇಶದಲ್ಲಿ ಬಿಗಿ ಬಂದೋ ಬಸ್ತ್ ಏರ್ಪಡಿಸಿದೆ.

ಹೊಗೇನಕಲ್ ಯೋಜನೆ ಪೂರ್ಣಗೊಳಿಸಿಯೇ ಸಿದ್ಧ-ಕರುಣಾ

2008-04-02T23:03:00.000-07:00

ಹೊಗೇನಕಲ್ ನೀರಾವರಿ ಯೋಜನೆಗೆ ಕುರಿತು ಭಾನುವಾರದಂದು ನನ್ನ ತಾಳ್ಮೆಯನ್ನು ಪರೀಕ್ಷಿಸಬೇಡಿ ಎಂದು ಕರ್ನಾಟಕಕ್ಕೆ ಎಚ್ಚರಿ ಕೆ ನೀಡಿದ್ದ ತಮಿಳುನಾಡು ಮುಖ್ಯಮಂತ್ರಿ ಕರುಣಾನಿಧಿಯವರ ಹೇಳಿಕೆ ಇದೀಗ ರಾಜಧಾನಿ ಬೆಂಗಳೂರು ಸೇರಿದಂತೆ ರಾಜ್ಯದ ಹಲವೆಡೆ ಆಕ್ರೋಶಕ್ಕೆ ಎಡೆಮಾಡಿಕೊಟ್ಟಿದೆ.

ಯಾವುದೇ ಬೆಲೆ ತೆತ್ತಾದರೂ ನಾವು ಹೊಗೇನಕಲ್ ಯೋಜನೆಯನ್ನು ಪೂರ್ಣಗೊಳಿಸಿಯೇ ಸಿದ್ಧ ಎಂಬ ಕರುಣಾನಿಧಿಯವರ ಸವಾಲಿನ ಹೇಳಿಕೆಗೆ ಕನ್ನ ಡಪರ ಸಂಘಟನೆಗಳಿಂದ ತೀವ್ರ ವಿರೋಧ ವ್ಯಕ್ತವಾಗಿದೆ. ಈ ನಿಲುವನ್ನು ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿ ಸೇರಿದಂತೆ ರಾಜಕೀಯ ಪಕ್ಷಗಳು, ಸಂಘಸಂಸ್ಥೆಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿವೆ.

ಈ ನಿಟ್ಟಿನಲ್ಲಿ ತಮಿಳುನಾಡು ಹೊಗೇನಕಲ್‌‌ನಲ್ಲಿ ಆರಂಭಿಸಿರುವ ನೀರಾವರಿ ಯೋಜನೆಯನ್ನು ಕೂಡಲೇ ನಿಲ್ಲಿಸುವಂತೆ ಕೇಂದ್ರ ಸರಕಾರ ಸೂಚಿಸಬೇ ಕೆಂದು ಕರ್ನಾಟಕ ಕೇಂದ್ರಕ್ಕೆ ಆಗ್ರಹಿಸಿದೆ. ಈ ಬಗ್ಗೆ ಕೇಂದ್ರಕ್ಕೆ ಮತ್ತೊಮ್ಮೆ ಪತ್ರ ಬರೆಯುವುದಾಗಿ ರಾಜ್ಯದ ಮುಖ್ಯ ಕಾರ್ಯದರ್ಶಿ ಸುಧಾಕರ ರಾವ್ ಸುದ್ದಿಗಾರರೊಂದಿಗೆ ಮಾತನಾಡುತ್ತ ತಿಳಿಸಿದ್ದಾರೆ.

ಸುಮಾರು 1334ಕೋಟಿ ರೂಪಾಯಿ ಹೊಗೇನಕಲ್ ನೀರಾವರಿ ಯೋಜನೆಯನ್ನು ಪ್ರಾಣ ತೆತ್ತಾದರೂ ಪೂರ್ಣಗೊಳಿಸುತ್ತೇವೆ. ಇದರಲ್ಲಿ ಕರ್ನಾಟಕ ಕೀಳುಮಟ್ಟದ ರಾಜಕೀಯ ಮಾಡುವುದು ಬೇಡ ಎಂಬುದಾಗಿ ಮುಖ್ಯಮಂತ್ರಿ ಕರುಣಾನಿಧಿ ಭಾನುವಾರದಂದು ಹೇಳಿಕೆ ನೀಡಿದ್ದರು.

ಕರ್ನಾಟಕ ರಕ್ಷಣಾ ವೇದಿಕೆ ಕಾರ್ಯಕರ್ತರು ತಮಿಳು ಚಿತ್ರ ಪ್ರದರ್ಶಿಸುತ್ತಿದ್ದ ನಗರದ ನಾಲ್ಕು ಚಿತ್ರ ಮಂದಿರಗಳ ಮೇಲೆ ದಾಳಿ ಮಾಡಿ, ಪೋಸ್ಟರ್, ಬ್ಯಾನರ್ ಹರಿದು ಹಾಕಿ ದಾಂಧಲೆ ನಡೆಸುವ ಮೂಲಕ ತಮ್ಮ ವಿರೋಧವನ್ನು ವ್ಯಕ್ತಪಡಿಸಿದ್ದಾರೆ.

ಶೇಷಾದ್ರಿಪುರಂನಲ್ಲಿರುವ ನಟರಾಜ, ಜೆ.ಸಿ.ರಸ್ತೆ ಸಮೀಪದ ಪೂರ್ಣಿಮಾ, ಮೈಸೂರು ರಸ್ತೆಯಲ್ಲಿರುವ ವಿನಾಯಕ, ಕೆ.ಆರ್.ಮಾರ್ಕೆಟ್‌‌ನಲ್ಲಿರುವ ಸೂಪರ್ ಚಿತ್ರಮಂದಿರಗಳು ಸೇರಿದಂತೆ ನಗರದ ವಿವಿಧೆಡೆ ಚಿತ್ರಮಂದಿರಗಳ ಮೇಲೆ ಕರ್ನಾಟಕ ರಕ್ಷಣಾ ವೇದಿಕೆ ಕಾರ್ಯಕರ್ತರು ದಾಳಿ ನಡೆಸಿದ್ದರು.

ನಿಮ್ಮ ಅನಿಸಿಕೆ ....?

ತಮಿಳರ ರಕ್ಷಣೆಗೆ ಕೇಂದ್ರಕ್ಕೆ ಮನವಿ

2008-04-02T22:58:00.000-07:00

ಹೊಗೇನಕಲ್ ನೀರಾವರಿ ಯೋಜನೆಯ ಹಿನ್ನೆಲೆಯಲ್ಲಿ ಕರ್ನಾಟಕ ಮತ್ತು ತಮಿಳ್ನಾಡು ನಡುವೆ ಭುಗಿಲೆದ್ದಿರುವ ಗಲಭೆಯ ಹಿನ್ನೆಲೆಯಲ್ಲಿ, ಕರ್ನಾಟಕದಲ್ಲಿರುವ ತಮಿಳಿಗರಿಗೆ ಭದ್ರತೆ ಒದಗಿಸಬೇಕು ಎಂದು ಕೋರಿರುವ ತಮಿಳ್ನಾಡು, ಈ ಕುರಿತು ಕೇಂದ್ರ ಸರಕಾರ ಮಧ್ಯಪ್ರವೇಶಿಸುವಂತೆ ಕೋರಲು ನಿರ್ಣಯವನ್ನೂ ಪಾಸುಮಾಡಿದೆ.

ಕರ್ನಾಟಕದಲ್ಲಿ ತಮಿಳು ಸಿನಿಮಾ ಪ್ರದರ್ಶಿಸಿರುವ ಚಿತ್ರಮಂದಿರಗಳ ಹಾಗೂ ತಮಿಳು ಸಂಘಟನೆಯ ಕಚೇರಿಯೊಂದರ ಮೇಲೆ ನಡೆಸಲಾಗಿರುವ ದಾಳಿಯ ಕುರಿತಂತೆ ಕರ್ನಾಟಕ ಮುಖ್ಯಕಾರ್ಯದರ್ಶಿಯೊಂದಿಗೆ ಮಾತನಾಡಿರುವುದಾಗಿ ತಮಿಳ್ನಾಡು ಮುಖ್ಯ ಕಾರ್ಯದರ್ಶಿ ಎಲ್.ಕೆ.ತ್ರಿಪಾಠಿ ಹೇಳಿದ್ದಾರೆ.

ನಿರಂತರ ಸಂವಹನ ನಡೆಸುತ್ತಿದ್ದು ಕರ್ನಾಟಕವು ತಮಿಳರಿಗೆ ಸೂಕ್ತ ಭದ್ರತೆ ನೀಡಬಹುದೆಂಬ ವಿಶ್ವಾಸ ಹೊಂದಿರುವುದಾಗಿ ಅವರು ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ಭಾಷಾ ದುರಭಿಮಾನಿಗಳು ಎಬ್ಬಿಸಿರುವ ದಾಂಧಲೆ ಹಾಗೂ ದಾಳಿಗಳ ವಿರುದ್ಧ ಕೇಂದ್ರ ಸರಕಾರವು ಮಧ್ಯಪ್ರವೇಶಿಸಬೇಕು ಎಂಬ ನಿರ್ಣಯಕ್ಕೆ ಪಕ್ಷಭೇದವಿಲ್ಲದಂತೆ ಲಭಿಸಿರುವ ಅಪರೂಪದ ಬೆಂಬಲದಿಂದಾಗಿ ಅವಿರೋಧವಾಗಿ ಪಾಸುಮಾಡಲಾಗಿದೆ.

ತಮಿಳ್ನಾಡು ಯಾವಾಗಲೂ ತನ್ನ ನೆರೆರಾಜ್ಯಗಳೊಂದಿಗೆ ಸೌಹಾರ್ದ ಮತ್ತು ಭ್ರಾತ್ರತ್ವದ ಸಂಬಂಧ ಹೊಂದಿದೆ, ಆದರೆ ಈ ಅಂಧಾಭಿಮಾನಿಗಳು ತಮಿಳರ ಅಭ್ಯುದಯವನ್ನು ವಿರೋಧಿಸುತ್ತಿದ್ದಾರೆ. ಯೋಜನೆಯ ಕುರಿತ ವಿರೋಧ ಹಾಗೂ ಹಿಂಸಾಚಾರವು ರಾಷ್ಟ್ರದ ಸಮಗ್ರತೆ ಮತ್ತು ಸಾರ್ವಭೌಮತ್ವಕ್ಕೆ ವಿರೋಧವಾಗಿದೆ" ಎಂದು ತಮಿಳ್ನಾಡು ಮುಖ್ಯಮಂತ್ರಿ ಕರುಣಾನಿಧಿ ಹೇಳಿದ್ದಾರೆ.

"ಕರ್ನಾಟಕದ ಕೆಲವು ಭಾಷಾ ದುರಭಿಮಾನಿಗಳಿಗೆ ತಮಿಳರ ವಿರುದ್ಧ ಯಾವತ್ತೂ ಅಲರ್ಜಿ. ಇದನ್ನು ತೊಡೆದು ಹಾಕದಿದ್ದಲ್ಲಿ ಸಾರ್ವಭೌಮತ್ವ ಮತ್ತು ಸಮಗ್ರತೆ ಶಬ್ಧಗಳಾಗಿ ಮಾತ್ರ ಉಳಿಯುತ್ತದೆ" ಎಂದು ಅವರು ಅಭಿಪ್ರಾಯಿಸಿದ್ದಾರೆ.

ಕರುಣಾನಿಧಿ ವಂದನೆ
ಕೇಂದ್ರದ ಹಸ್ತಕ್ಷೇಪ ಕೋರಿ ಪಾಸು ಮಾಡಲಾದ ನಿರ್ಣಯಕ್ಕೆ ಪಕ್ಷಬೇಧ ಮರೆತು ಬೆಂಬಲ ನೀಡಿದ ವಿರೋಧ ಪಕ್ಷಗಳಿಗೆ ಕರುಣಾನಿಧಿ ತಾನೇ ಸ್ವಯಂ ವಂದನೆಗಳನ್ನು ಸಲ್ಲಿಸಿದರು.

"ತಮಿಳರ ಕಾರಣಕ್ಕಾಗಿ ನಾವೆಲ್ಲರು ಒಂದಾಗುವಂತೆ ಮಾಡಿರುವ ಭಾಷಾ ದುರಭಿಮಾನಿ ಸಂಘಟನೆಗಳ ಕ್ರಮವನ್ನು ನಾವು ಸ್ವಾಗತಿಸಬೇಕು" ಎಂದು ಅವರು ಸದನ ವಂದನೆ ಸಲ್ಲಿಸುತ್ತಾ ನುಡಿದರು.

ನಿಮ್ಮ ಅನಿಸಿಕೆ ....?

ತಮಿಳ್ನಾಡಿನಲ್ಲಿ ಕನ್ನಡ ಚಾನೆಲ್‌ಗಳಿಗೆ ಕತ್ತರಿ

2008-04-02T22:53:00.000-07:00

ಮುಯ್ಯಿಗೆ ಮುಯ್ಯಿ ಎಂಬಂತೆ, ಕರ್ನಾಟಕದಲ್ಲಿ ತಮಿಳು ಚಿತ್ರ ಪ್ರದರ್ಶನ ಹಾಗೂ ತಮಿಳು ಚಾನೆಲ್‌ಗಳ ಪ್ರಸಾರವನ್ನು ಸ್ಥಳೀಯ ಕೇಬಲ್ ಆಪರೇಟರ್‌ಗಳು ಬಂದ್ ಮಾಡಿರುವುದಕ್ಕೆ ಪ್ರತಿಯಾಗಿ ತಮಿಳ್ನಾಡಿನಲ್ಲಿಯೂ ಕನ್ನಡ ಚಾನೆಲ್‌ಗಳ ಪ್ರಸಾರವನ್ನು ತಡೆಯುವಂತೆ ಹೇಳಲಾಗಿದೆ. ಕರ್ನಾಟಕದಲ್ಲಿ ಮಂಗಳವಾರ ಸಂಜೆಯಿಂದ ತಮಿಳು ಚಾನೆಲ್‌ಗಳ ಪ್ರಸಾರವನ್ನು ತಡೆಹಿಡಿಯಲಾಗಿದೆ.

ಚುನಾವಣೆ ತನಕ ತಡೆಹಿಡಿಯಲಿ
ಏತನ್ಮಧ್ಯೆ, ಹೊಗೇನಕಲ್ ವಿಚಾರವನ್ನು ಪ್ರಧಾನಿಯ ಬಳಿಗೊಯ್ದಿರುವ ಮಾಜಿ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ, ಈ ವಿವಾದಾಸ್ಪದ ಯೋಜನೆಯನ್ನು ರಾಜ್ಯದಲ್ಲಿ ಹೊಸ ಸರ್ಕಾರ ಅಸ್ತಿತ್ವಕ್ಕೆ ಬರುವ ತನಕ ತಡೆಹಿಡಿಯಬೇಕು ಎಂದು ಹೇಳಿದ್ದಾರೆ.

"ಮುಂದಿನ ತಿಂಗಳಲ್ಲಿ ನಡೆಯುವ ಚುನಾವಣೆಯ ಬಳಿಕ ಅಸ್ತಿತ್ವಕ್ಕೆ ಬರಲಿರುವ ಹೊಸ ಸರಕಾರವು ರಾಜ್ಯದ ಹಿತಾಸಕ್ತಿಯನ್ನು ಸೂಕ್ತವಾಗಿ ರಕ್ಷಿಸಬಲ್ಲುದು. ಈ ಕುರಿತಂತೆ ಪ್ರಧಾನಿ ಮನಮೋಹನ್ ಸಿಂಗ್ ತಮಿಳ್ನಾಡಿನ ಮೇಲೆ ಪ್ರಭಾವ ಬೀರಬೇಕು ಎಂದು ಹೇಳಿರುವ ಕೃಷ್ಣ ತಮಿಳ್ನಾಡು ಮುಖ್ಯಮಂತ್ರಿಗಳು ಪ್ರಯೋಗಿಸಿರುವ ಕಟುಭಾಷೆಯು ಅನಿರೀಕ್ಷಿತವಾಗಿದೆ, ಇದು ಕನ್ನಡ ಕಾರ್ಯಕರ್ತರನ್ನು ಪ್ರಚೋದಿಸಿದೆ" ಎಂದು ಕೃಷ್ಣ ಹೇಳಿದ್ದಾರೆ.

ತಮಿಳು ಚಿತ್ರ ಪ್ರದರ್ಶನಕ್ಕೆ ತಡೆ ಒಡ್ಡುತ್ತಿರುವ 'ಭಾಷಾ ದುರಭಿಮಾನಿ'ಗಳನ್ನು ತಡೆದು, ತಮಿಳರ ಹಕ್ಕುಗಳನ್ನು ರಕ್ಷಿಸಲು ಕೇಂದ್ರ ಸರಕಾರ ಹಸ್ತಕ್ಷೇಪ ನಡೆಸಬೇಕು ಎಂದು ತಮಿಳ್ನಾಡು ಕೇಂದ್ರವನ್ನು ವಿನಂತಿಸಿದೆ. ದೇಶದ ಸಮಗ್ರತೆ ಮತ್ತು ಸಾರ್ವಭೌಮತ್ವವನ್ನು ಕಾಪಾಡಬೇಕು ಎಂದು ತಮಿಳುನಾಡು ಮುಖ್ಯಮಂತ್ರಿ ಕೇಂದ್ರವನ್ನು ಮಂಗಳವಾರ ಒತ್ತಾಯಿಸಿದ್ದರು.

ನಿಮ್ಮ ಅನಿಸಿಕೆ ....?

ಕಸ್ತೂರಿ ವಾಹಿನಿ ಮಾರಾಟವಾಗುತ್ತಾ, ಒಪ್ಪಂದ ಮಾಡಿಕೊಳ್ಳುತ್ತಾ?

2008-03-23T08:35:00.000-07:00

ಮಹತ್ವಾಕಾಂಕ್ಷೆಯೊಂದಿಗೆ ಪ್ರಾರಂಭವಾದ ಕಸ್ತೂರಿ ವಾಹಿನಿ ತೊಂದರೆಯಲ್ಲಿದೆಯಾ? ಅದು ಬೇರೊಬ್ಬರಿಗೆ ಮಾರಾಟವಾಗುತ್ತಾ? ಅಥವಾ ಮತ್ತೊಂದು ಖ್ಯಾತ ಚಾನೆಲ್‌ನೊಂದಿಗೆ ಟೈ-ಅಪ್ ಮಾಡಿಕೊಳ್ಳುತ್ತಾ?...

ಹೀಗೆ ಕಸ್ತೂರಿ ವಾಹಿನಿಗೆ ಸಂಬಂಧಿಸಿದಂತೆ ಪುಂಖಾನುಪುಂಖವಾಗಿ ಸುದ್ದಿಗಳು ಹಬ್ಬುತ್ತಿವೆ. ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿಯವರ ಪತ್ನಿ ಅನಿತಾ ಕುಮಾರಸ್ವಾಮಿಯವರು ಈ ಚಾನೆಲ್ ಶುರುಮಾಡುವಾಗ ಕನ್ನಡದ್ದೇ ಆದ ಚಾನೆಲ್ ಎಂಬ ಹುಮ್ಮಸ್ಸಿತ್ತು. ಆದರೆ ಸಾಕಷ್ಟು ಸಂಶೋಧನೆ, ಪೂರ್ವಸಿದ್ಧತೆಯಿಲ್ಲದೆ ಪ್ರಾರಂಭಿಸಿದ್ದಕ್ಕೆ ಆಗಾಗ ತೊಂದರೆಗಳು ಎದುರಾಗುತ್ತಿವೆ ಎಂದು ಈ ವಲಯದ ಕೆಲವೊಂದು ಮೂಲಗಳು ಸುದ್ದಿಯನ್ನು ಹರಿಯಬಿಟ್ಟಿವೆ.

ಒಂದು ಮೂಲದ ಪ್ರಕಾರ ಚಾನೆಲ್ ಓಟ್ರೇಟ್ ಸೇಲ್ ನಡೆಯಲಿದೆ. ಒಂದು ವೇಳೆ ಬಯಸುವ ಬೆಲೆ ಸಿಗದಿದ್ದಲ್ಲಿ ದೇಶದ ಪ್ರತಿಷ್ಠಿತ ನ್ಯೂಸ್ ಚಾನೆಲ್ನೊಂದಿಗೆ ಒಪ್ಪಂದ ಮಾಡಿಕೊಂಡು ಕಸ್ತೂರಿ ವಾಹಿನಿಯನ್ನು ಮುನ್ನಡೆಸುವ ಚಿಂತನೆಗಳೂ ಚಾಲ್ತಿಯಲ್ಲಿವೆ ಎನ್ನಲಾಗುತ್ತಿದೆ.

ಇತ್ತೀಚೆಗಷ್ಟೇ ಮುಗಿದ ಸಪ್ತಸ್ವರ ಎಂಬ ಹೆಸರಿನ ಮಕ್ಕಳ ಸಂಗೀತ ಸ್ಪರ್ಧೆ ಬಿತ್ತರವಾಗುವವರೆಗೂ ಕಸ್ತೂರಿ ವಾಹಿನಿಗೆ ಒಂದಷ್ಟು ಟಿಆರ್‌ಪಿ ಇತ್ತು. ಅದರೆ ಟಿವಿ9 ರೀತಿಯ ಸಂಚಲನೆ ಸೃಷ್ಟಿಸುವ ಸುದ್ದಿ ವೈಶಿಷ್ಟ್ಯವಾಗಲೀ, ಈ-ಟಿವಿಯ ತರಹ ಉತ್ತಮ ಧಾರಾವಾಹಿಗಳ ಬೆಂಬಲವಾಗಲೀ ಅಥವಾ ಉದಯ ವಾಹಿನಿಯ ವಿಭಿನ್ನ ಸ್ವರೂಪದ ಸ್ಪರ್ಧೆಯನ್ನೆದುರಿಸುವ ಸಾಮರ್ಥ್ಯವಾಗಲೀ ಕಸ್ತೂರಿ ವಾಹಿನಿಗಿಲ್ಲದಿರುವುದು ಒಂದು ನ್ಯೂನತೆ. ಹೀಗಾದಾಗ ಹಿನ್ನಡೆ ಸಹಜವೇ ತಾನೇ?

ಒಟ್ಟಿನಲ್ಲಿ ಈ ಕುರಿತು ಅಧಿಕೃತ ಸುದ್ದಿಯಿನ್ನೂ ಹೊರಬಿದ್ದಿಲ್ಲ. ಎಲ್ಲಾ ತೆರೆಮರೆಯ ಸುದ್ದಿಗಳೇ. ಒಂದು ಚಾನೆಲ್ ಸ್ಥಿರವಾಗಿ ನಿಲ್ಲಲು ಸಾಕಷ್ಟ್ಟು ಸಮಯ ತೆಗೆದುಕೊಳ್ಳುತ್ತದೆ. ಕಸ್ತೂರಿ ಸ್ವಲ್ಪ ಹೆಚ್ಚು ಸಮಯ ತೆಗೆದುಕೊಂಡಿರಬಹುದು. ಮಾರಾಟವೋ, ಒಪ್ಪಂದವೋ ಏನೇ ಆಗಲಿ ಕಸ್ತೂರಿ ಮುಂದುವರಿಯಲಿ ಎಂಬುದು ಬಹುತೇಕ ಜನರ ಅಭಿಪ್ರಾಯ.

ನಿಮ್ಮ ಅನಿಸಿಕೆ ....?